پکتيا کې د طبیعي پېښو پر وړاندې د چمتووالي غونډه ترسره شوه
۳۱ زمری ۱۴۰۱ه.ش
۲۴ محرم الحرام ۱۴۴۴ ه.ق
د پکتيا ولايت د کرنې، اوبولګولو او مالدارۍ رياست په مقام کې د طبيعي پېښو پر وړاندې د چمتووالي غونډه د ياد رياست د رئیس ښاغلي الحاج مولوي عبدالروف سعيد په مشرۍ ترسره شوه؛ چې پکې د پېښو پر وړاندې د مبارزې رئیس ښاغلي مولوي نثار احمد نجات، د کرنې رياست آمرينو او د اړيکو دفتر، پاملرنې، سولې ريښې، د ځمکې او ځنګلونو د تلپاتې مدیریت او د خوړو د نړيوال پروګرام استازو ګډون کړی وو.
په غونډه کې د پکتيا دکرنې رييس الحاج مولوی عبدالرؤف سعيد وويل وروستيو سختو سېلابونو پکتياوالو ته سخت مالي او ځاني زيانونه اړولي او ډيرې کرنيزې ځمکې او حاصلات یې تخريب کړي؛ نوموړي د همکارو موسسو له مسولينو وغوښتل چې د زيانمن شويو سره د لاسنیوي په موخه خپلې همکارۍ ډېر کړي.
په غونډه کې د همکارو موسسو مسولينو په ياده برخه کې پر خپلو ترسره شويو کړنو رڼا واچوله او په ياده برخه کې يې د خپلو راتلونکو پروژو په اړه معلومات شريک کړل.
د غونډې په پای کې ښاغلي نجات د وروستيو سېلابونو له امله د اوښتو زيانونو معلومات شريک او د خپلو ترسره شويو کړنو راپور وړاندې کړ.
د يادولو وړ ده چې شته امکاناتو ته په کتو به له زيانمنو سره مرسته وشي او په ياده برخه کې به د نړيوالو مرستې جلب شي.
