د ننګرهار په چپرهار کې د يو کانال او سربند د جوړولو چارې پيل شوې
۲۶ زمری ۱۴۰۱ه.ش
۱۹ محرم الحرام ۱۴۴۴ ه.ق
د ننګرهار ولايت د کرنې، اوبولګولو او مالدارۍ رياست وايي، چې ددې ولايت د چپرهار په ولسوالۍ کې د۸.۷ میلیونه افغانیو په لګښت د یو کانال او سربند جوړولو چارې پیل شوې.
د ننګرهار د کرنې رياست چارواکي وويل:"دچپرهار په ولسوالۍ کې د دوو کیلومترو په اوږدوالي د یو کانال او سربند د اساسي جوړلو چارې پیل شوې".
د یادې ولسوالۍ ولسوال ملا دوست محمد مسلم روحاني په خبره ددې پروژې چارې د اسلامیک ریلیف موسسې په همکارۍ د چپرهار ولسوالۍ اړوند د شیخ کلا په کلي کې پیل شوې، چې له بشپړیدو سره به یې سلگونه جریبه کرنيزې ځمکو ته د خړوبولو اوبه ورسېږي او سلګونه خلکو ته پکې د کار کولو زمینه هم برابره شوه.
بايد وويل شي، چې څو ورځې وړاندې هم د همدې موسسي له لورې د ګلدري کانال او سربند کارونه هم پیل شوي وه او په نږدې راتلونکې کې به د ډاګو کانال چارې هم پيل شي.
