غزنې کې د ۳۹ ممیزخونو د جوړولو چارې په بشپړېدو دي

۲۹ چنګاښ ۱۳۹۸
د غزنې دکرنې، اوبولګولو او مالدارۍ ریاست چارواکي وایي، چې ددې ولایت په پنځو ولسوالیو کې د ۳۹ ممیزخونو د جوړولو چارې موده مخکې پیل شوي دي، چې د ډېر شمېر هغو چارې یې د بشپړېدو په درشل کې دي.
دغه ممیز خونې، د کرنې وزارت د بڼوالۍ او مالدارۍ ملي برنامې «NHLP» له خوا په عصري بڼه جوړیږي، چې د څه باندې ۹ مټریک ټنه انګورو د وچولو وړتیالري.
د غزنې د کرنې ریاست چارواکي وایي، چې یاد ممیزخونې په دې ولایت کې د ممیزخونو د صنعتد ترویج، د بڼوالو د اقتصادي ودې او د انګورو باغونو د محصولاتو د ارزښت لوړولو په پار په معیاري او اسټنډرد ډول جوړیږي.
یاد ممیز خونې د معیاري او ښه کیفیت لرونکي ممیزو د تولید لامل کیږي او همداراز د انګورو د ضایعاتو مخه نیسي.
د غزنې د کرنې ریاست وایي، چې دغه ممیز خونې به د بڼوالو په اقتصادي وده کې رغنده رول ولوبوي، ځکه کوم ممیز چې په دغو ممیزخونو کې تولیدیږي له هغو ممیزو څخه چې په دودیزه بڼه تولیدي څوچنده ښه کیفیت لري.
ممیز د افغانستان یو مهم صادراتي توکی ده او د ممیز خونو جوړول د معیاري ممیزو په تولید کې له بزګرانو سره مرسته کوي.