د هلمند د ناوې ولسوالی یوشمېر بزګرو ته د نباتي افتونو او ناروغیو د مخنیوی لارې چارې وښودل شوې
۱۶ چنګاښ ۱۴۰۱ ه.ش
۸ ذوالحجَّة ۱۴۴۳ ه.ق
د هلمند دکرنې، اوبولګولو او مالدارۍ ریاست له خوا ددې ولایت د ناوې ولسوالی یوشمېر بزګرانو ته د نباتي افتونو او ناروغیو د مخنیوي لارې چارې ښودل شوي دي.
دهلمند ولایت مرکز لښکرګاه په ګډون، ددې ولایت په ګڼو ولسوالیو کې بزګران د پنبې او ممپلیو (پلیو) کښتونه زیات کړي دي، چې د یادو ولسوالیو له ډلې یوه هم ناوې ولسوالی ده، چې په پراخه کچه پکې پنبه او ممپلي کرل شوي دي.
پنبه او ممپلي چې د کورني بازار تر څنګ بهرني بازار لري او په مناسبه بیه پلورل کېږي په دې وروستیو کې د هلمند بزګرو ورته مخه کړې ده.
ددې لپاره چې بزګر د خپلو ځمکو څخه باکیفیته حاصلات ترلاسه کړي، په ناوې ولسوالی کې دبوټو ساتنې د سیمه ییز مدیریت کارکونکو لخوا د پنبه دانې او ممپلیو دنارغیو د مخنيوی او کنټرول په برخه کې کرونده ګرو ته میخانیکي او کیمیاوي لارې چارې وښودل شوې ترڅو کښتونه یې له ناروغیو څخه پاک او ښه حاصلات ترلاسه کړي.
د هلمند ولایت دکرنې، اوبولګولو او مالدارۍ ریاست د خپلو مسلکي کارمندانو په مټ هڅه کوي ترڅو د ممپلیو او پنبې کرکېله، روزنې او ښې پالنې په موخه بزګرو ته د عملي او نظري زده کړو زمینه برابره کړي او له همدې لارې د بزګرانو په کرنیز اقتصاد کې بهبود او نوښت رامنځته کړي.
