د پکتیا دکرنې ریاست: کرنې ریاست سره د ځمکو ریاست د یوځای کېدو په پار غونډه وشوه
۱۵ چنګاښ ۱۴۰۱ ه.ش
۷ ذوالحجَّة ۱۴۴۳ ه.ق
د وزيرانو شورا د پريکړې او د امیرالمؤمنین د حکم په اساس په ټولو ولایتونو کې د اراضي ریاستونه د کرنې، اوبولګولو او مالدارۍ وزارت په چوکاټ کې مدغم کېږي.
په همدې موخه د پکتیا ولايت اړوند د ځمکو رياست د کرنې په رياست کې د مدغم کیدو په اړه ټاکل شوې کميټې لومړنۍ ناسته ترسره کړه، چې پکې د پکتیا د ولايت مقام، د کرنې، مستوفيت، ښاروالۍ او اقتصاد رياستونو استازو ګډون کړی وو.
په ناسته کې د غونډې ګډونوالو د ياد رياست د انتقال په قانوني لارو چارو خبرې وکړې او د وخت د کمښت او ځينو ستونزو له مخې به یې د انتقال چارې له لوی اختر څخه وروسته پيل شي.
د پکتیا د کرنې رياست سرپرست ښاغلی مولوي احسان الله احسان وايي، چې د انتقال پروسې د بشپړيدو لپاره به د ټاکل شوې کميټې سره په ګډه اړينې کړنې ترسره کړي.
