کندز کې پر بزګرانو د غنمو د اصلاح شوي تخم د وېش لړۍ پیل شوه

‌۴ليندۍ ۱۴۰۰
د کندز ولایت د کرنې ریاست مسؤلین وايي، چې د یاد ولایت په چهار درې ولسوالۍ کې پر زرو بزګرانو د غنمو اصلاح شوي تخم د وېشلو لړۍ پیل شوې، چې هر بزګر ته یوه بوجۍ اصلاح شوی تخم، ورکول کیږي.
په دې اړه جوړه شوې غونډه کې دکندز دکرنې رئيس مولوی امان الله حسن له همکارو مؤسسو څخه مننه وکړه، چې په دې حساسو شراېطو کې د بزګرانو لاس نيوی کوي، هغه له بزګرانو وغوښتل، چې دغه اصلاح شوي تخم څخه په سمه توګه ګټه پورته کړي.
 ښاغلی حسن دغه راز زیاته کړه، چې د کرنې او مالدارۍ ریاست ژمن دی، چې په دغه ولایت کې ډېرې پروژې پلي کړي. 
په همدې حال کې دغنمو اصلاح شويو تخمونو څخه برخمن شوې بزګران وويل:" ډېر د خوشالۍ ځای ده، چې په دې حساسو شرایطو کې د کرنې او مالدارۍ ریاست او اړونده مؤسسات له بزګرانو سره مرسته کوي."
دوی ژمنه وکړه، چې دغه غنم به په خپلو ځمکو کې کري او ددې ولايت دکرنيزو محصولاتو د پراختيا په پار هلې ځلې کوي.
ديادونې وړ ده، چې دکرنې وزارت دکندز د چهاردرې ولسوالۍ ترڅنګ ددې ولايت د يوشمېر نورو ولسواليو او د هېواد د يوشمېر نورو ولايتو پر بزګرانو هم د غنمو د اصلاح شوي تخم د وېش لړۍ پيل کړې ده.