د نيمروز دکرنې رئيس د (FAO) ادارې او (ANRCC) موسسې د سوېل لوېديځې حوزې چارواکو سره وکتل

۲۶ ربیع الأول،  ۱۰ لړم
د نیمروز ولایت د کرنې، اوبولګولو  او مالداری رئیس محمد سعید جوهري، د ملګروملتونو د خوړو او کرنې ادارې (FAO)
  او (ANRCC) موسسې استازو  فیروز آرین او ممتاز بریالی سره د خپل کار په دفتر کې وکتل.
په دې کتنه کې، د کرنې رئیس په نیمروز کې د کروندګرو او مالدارانو پر ستونزو خبرې وکړې او زیاته یې کړه، چې د وچکالۍ له امله د ولایت په کچه بزګران او مالداران ډېر زیانمن شوي دي او مالي زيانونه یې لیدلي دي.
په دې ناسته کې  د (FAO) ادارې او (ANRCC) موسسې د سوېل لوېديځې حوزې چارواکو ژمنه وکړه،  چې د نيمروز ولايت په مرکز زرنج او ددې ولايت په چهاربرجک، کنګ، دلارام او خاشرود ولسواليو پر يوشمېر بزګرانو د غنمو اصلاح سوي تخمونه او کيمياوي سرې وېشې.
 او همدا راز د یادې مؤسسې له لارې به د نیمروز ولایت په  څلورو ولسواليو (کنګ، چهار برجګ، دلارام او خاشرود) کې څلورو زرو  مالدارانو ته ۲۰۰ کیلو حیواني خوراکه، چې ټولټال ۸۰۰  ټنه کېږي؛ مرسته کېږي.
يادې مرستې ددې ولايت د کرنې او مالدارۍ د پراختيا او د کروندګرو او مالدارانو د ملاتړ په موخه پر مستحقو هغو وېشل کېږي.