لوګر کې د کاریز کلی د اوبولګولو کانال رغنیزې چارې ۸۰ سلنه پرمخ تللې
۱۹ زمری ۱۴۰۰
د لوګر ولایت د محمد آغې ولسوالۍ اړوند د کاریز کلی د اوبولګولو کانال د پروژې رغنیزې چارې روانې دي، چې تر دې دمه یې رغنیزې چارې څه باندې ۸۰ سلنه بشپړ شوي دي.
ددې کانال د رغولو ټولیز لګښت ۳.۵ میلیونه افغانۍ ده، چې د کرنې د پرمختیا نړیوال صندوق (IFAD) له خوا تمویل او د کرنې وزارت د خلکو په ګډون دکرنې او مالدارۍ پروګرام(CLAP) له لارې پلي کېږي.
ددې پروژې له ګټو څخه ۱۰۰ کورنۍ په نېغه او ۷۰۰ کورنۍ په نانېغه توګه برخمن کېږي.
د اوبولګولو د یاد کانال په بیارغولو سره به ۸۱ هکټاره کرنیزه ځمکه خړوبه او سلګونه نارینه او ښځینه کروندګر او مالداران به ترې برخمنې شي، او د یادې سیمې د کرنیز سکټور د پیاوړتیا لامل شي.
باید وویل شي، چې دیادې پروژې په پلي کولو سره به د یادې سیمې د بزګرانو ډېرې ستونزې هوارې او د کرنیزو محصولاتو د کچې د لوړېدا لامل شي.
