ننګرهار کې د اوبولګولو دوه کانالونه ګټې اخیستنې ته وسپارل شول
د کرنې، اوبولګولو اومالدارۍ وزارت د ننګرهار ولایت په بټي کوټ ولسوالۍ کې د ننګرهار کانال د زېرمو د بیارغونې پروژې (NVDA) په اډانه کې د اوبولګولو د دوو فرعي کانالونو د رغولو چارې بشپړ او ګټې اخیستنې ته وسپارل. دغه کانالونه چې له عمومي کانال څخه بیلیږي د «شلمي او یویشتمي» ویالې په نوم یادیږي.
یاد کانالونه، چې په ټولیزه توګه ۱۷ کیلو متره اوږدوالی لري په پاخه او اساسي ډول رغول شوي دي، چې د اوبو د تنظیم او وېش په برخه کې د یادو سیمو د بزګرانو ستونزې په اساسي توګه حل کړي دي.
د دغو کانالونو د جوړولو ټولیز لګښت ۱.۶ میلیونه افغانۍ ده، چې د اسیایي پراختیایي بانک له خوا ورکړل شوې دي.
یاد کانالونه په ټولیزه توګه دوه زره هکټاره ځمکه خړوبوی او همدارنګه له دغو کانالونو څخه د یادو سیمو لس زره اوسیدونکي ګټه پورته کوي.
د دغو کانالونو رغول ددې ترڅنګ، چې د اوبو د ضایعاتو مخه نیولي ده د کانالونو تر پوښښ لاندې ځمکو حاصلات یي پنځه ویشت سلنه زیات کړي هم دي.
