۱ وږی ۱۳۹۹

د هلمند د کرنې، اوبولګولو او مالدارۍ ریاست وایي، چې سږکال په دې ولایت کې د کونځلو کروندې زیاتې شوي دي او ددې هیلې شته چې حاصلات یې هم د نورو کلونو په پرتله زیات شي.

دهلمند دکرنې رییس زلمی الکو وایي، چې روان کال ددې ولایت په یو زر او ۶۳۴ هکټاره ځمکه کونځلې کرل شوي، چې د هر هکټار حاصل یې ۱.۲ مټریک ټنه اټکل شوې ده.

ښاغلی الکو وویل، چې د هلمند دکرنې ریاست په دې وروستیو کلونوکې بزګرو او ځمکوالو ته د بېلابېلو پروګرامونو له لارې عامه پوهاوی او زده کړې ورکوي ترڅو مشروع کرکېلي ته مخه کړي او ددې ترڅنګ بزګرانو سره د اصلاح شویو تخمونو او کیمیاوي سرو په برخه کې مرستې او همکارۍ هم کوي.

هلمند یو له هغو ولایتونو دی چې د کونځلو د کر لپاره مناسبه هوا او اوبه لري.

باید وویل شي، چې د هلمند دکرنې، اوبولګولو او مالدارۍ ریاست په دې ولایت کې د بزګرانو د ملاتړ او د کوکنارو د کرکېلي د بدیل پیداکولو په پار تل هلې ځلې کوي او په دې برخه کې یې ګڼ شمېر بریالي پروګرامونه هم پلي کړي دي.