۲۹ زمری ۱۳۹۹

د لوګر د کرنې، اوبولګولو او مالدارۍ ریاست وایي، چې په دې ولایت کې د پخوا په پرتله خلک د هندواڼو کرکېلي ته لېوال شوي، چې ورسره په دې ولایت کې د هندواڼو کروندې او حاصلات کال په کال زیاتیږي.

د لوګر د کرنې ریاست ددې ولایت د هندواڼو سږنۍ حاصلات د تېرو کلونو په پرتله بې مخینه بولي او وایي، چې بزګرانو سره د کرنې وزارت همکارۍ او مرستې، پراخ ورښتونه او د طبیعي افتونو نشتون ددې لامل شوي، چې د هندواڼو حاصلات زیات شي.

لوګر د هندواڼو کرکېلي او ودې لپاره مناسب اقلیم لري؛ په همدې موخه ددې ولایت ډېری بزګران هندواڼو کرکېلي ته زړه ښه کوي.

د لوګر ولایت د هندواڼو حاصلات په مناسب موسم کې بازار ته وړاندې کیږي او د پلور ښه فرصت لري. د لوګر د کرنې ریاست دچارواکو په خبره، کله چې د تودو ولایتونو هندواڼې مخ په ختمېدو شي، په همدې وخت کې د لوګر د هندواڼو حاصلات بازار ته وړاندې کیږي، او په مناسبه بیه پلورل کیږي.