لوګر کې د کوچیانو د اقتصاد د پیاوړتیا په پار هڅې
۲۲ زمری ۱۳۹۹
د کرنې، اوبولګولو او مالدارۍ وزارت اړوند د (DCA / CLAP) پروژه د کرنې او مالدارۍ په برخه کې د نورو چوپړونو ترڅنګ په هېواد کې دمېشتو کوچیانو د اقتصادي پیاوړتیا په پار هم هلې ځلې کوي.
د دغو هلو ځلو په دوام داځل د لوګر ولایت د محمدآغې ولسوالۍ د سرخ آباد په کلي کې د کوچیانو د ښځینه سپما ګروپ لپاره ۱۵ پسونه اخیستي دي. دغه پسونه به له درېوو میاشتو ساتلو او چاغولو وروسته پلور ته چمتو کیږي او دغه پسونه له یادو کورنیو څخه په لوړه بیه پېرل کیږي، چې له یوې خوا کوچیان له بې روزګارۍ څخه وژغورل شي او هم یې اقتصادي پیاوړتیا ته زمینه برابره شي.
د لوګر ولایت د محمدآغې ولسوالۍ په سرخ آباد کې مېشت کوچیان له دې برنامې څخه د هرکلۍ ترڅنګ د کرنې وزارت له چوپړونو څخه مننه او قدرداني وکړ.
د کرنی وزارت، د کلپ - کوچې پروژې له لارې کوچيمالدارانو ته د مالدارۍ د پراختیا په موخه ګڼ خدمات وړاندی کیږي تر څو د دوی په کړنو کې په بدلون سره د څارویو حاصلات زیات او په کوچي ټولنه کې د بېوزلۍ کچه ټېټه شي.
