۲۰ زمری ۱۳۹۹

د کرنې، اوبولګولو او مالدارۍ وزارت د بڼوالۍ او مالدارۍ ملي پروژې «NHLP» له خوا د ننګرهار، کونړ او نورستانولایتونو سیمه ییزو وټرنرانو ته د مالونو د روغتیا ساتنې او تخنیکي چارو په تړاو روزنیزورکشاپ پیل شو.

دغه ورکشاپ چې د ننګرهار د کرنې، اوبولګولو او مالدارۍ په ریاست کې په لاره اچول شوې ده، د دوو ورځو لپاره ده، چې په ترڅ کې یې وټرنرانو ته د حیواني محرقې (بروسلوز)، انټرک او کانګو تبې ( CCHF) په تړاو اړین او هر اړخیز معلومات ورکول کیږي.

ددې ورکشاپ په پرانیست غونډه کې د ننګرهار د کرنې، اوبولګولو او مالدارۍ ریاست چارواکي دا ډول ورکشاپونه د مالدارۍ د سکټور د پیاوړي کولو، د وټرنرانو د ظرفیت لوړولو او د مالدارۍ په برخه کې د ښو خدماتو د عرضې برخه کې خورا اړین وباله.

په ورته وخت کې د بڼوالۍ او مالدارۍ پروژې د خیتځ زون مسوول په خپلو خبرو کې د مالدارۍ په برخه کې د بڼوالۍ او مالدارۍ پروژې له لورې په ترسره شویو فعالیتونو رڼا واچوله او زیاته یې کړه، چې ددې ورکشاپ په لړ کې د ځانګړو ټرینرانو له لوري د حیواني محرقې (بروسلوز)، انټرک او کانګو تبې ( CCHF ) په برخه کې به هر اړخیزې خبرې اترې ووشي. هغه وویل، چې هره میاشت به سیمه ییزو وټرنرانو ته داډول ورکشاپونه په لاره واچول شي، تر څو د سیمه ییزو وټرنرانو وړتیاوې لوړ او په خپلو ولسوالیو کې د حیواني ناروغیو دمخنیوي په برخه کې مالدارانو ته وړ چوپړونه وړاندې کړي.