هلمند کې د انجې کرکېله زیاته شوې ده

۴ وری ۱۳۹۹
په هلمند ولایت کې د انجې کرکېله او سوداګري په غوړېدو ده.
د هلمند د کرنې، اوبولګولو او مالدارۍ رییس زلمی الکو وایي، دوی هلې ځلې کوي چې په دې ولایت کې د کوکنارو د کرکېلي د مخنیوي په پار بزګرانو ته نوي ارزښت لرونکي کرنیزې توکي ور وپېژنې.
ښاغلي الکو وويل، په همدې موخه ددې ولایت د بولان په څېړنیز فارم کې په یوه جریبه ځمکه کې د انجې (هنګ) طبي بوټې کرل شوې وه او پرې څېړنې وشوې.
په دې فارم کې پر انجې تر څېړنو وروسته اوس مهال د هلمند د ګرم سېر ولسوالۍ ډېر شمېر بزګران د انجې کرکېلي ته مخه کړې او په دې ولسوالۍ کې په پراخه کچه هنګ یا انجه کرل شوې ده. د انجې یاد تخم د قزاقستان هېواد څخه راوړل شوې ده، چې سپین رنګ او د ښه کیفیت لرونکي دي.
لکه څنګه چې د انجې بوټي ډېرې کمې اوبو ته اړتیا لري نو ددې ولایت له خاورې، اوبو او هوا سره ښه مطابقت کوي.
انجه داسې بوټی دی چې د طبي موخو لپاره کارول کېدای شي او د کورني بازار تر څنګ نړیوال مارکېټ لري او په لوړه بیه پلورل کیږي.
د هلمند دکرنې، اوبولګولو او مالدارۍ ریاست په دې ولایت کې د بزګرانو د ملاتړ او د کوکنارو د کرکېلي د بدیل پیداکولو په پار تل هلې ځلې کوي او په دې برخه کې یې ګڼ شمېر بریالي پروګرامونه هم پلي کړي دي.