د لوګر د کرنې، اوبولګولو او مالدارۍ ریاست د کب شلمه، د نیالګیو اېښودو ملي ورځې په لمانځ غونډه کې وویل، چې له نن څخه په دې ولایت کې د نیالګیو اېښودو کمپاین پیل شوی او ددې کمپاین په ترڅ کې به د لوګر په مرکز او ولسوالیو کې څه باندې ۱۴۰ زره مېوه لرونکي او بې مېوې نیالګي کېنول شي.
د لوګر د کرنې ریاست وایي، چې ددې کمپاین په ترڅ د لوګر په ټولو ولسوالیو او مرکز کې ۱۱۵زره او ۶۲۵ مېوه لرونکي نیالګي او نږدې ۱۹ زره بې مېوې نیالګي اېښودل کیږي.
د لوګر د کرنې ریاست ددې ولایت له خلکو غواړي، چې په دې کمپاین کې ونډه واخلي او د ونو او نیالګیو ساتنې او څارنې ته ځانګړې پاملرنه وکړي.