خوست کې د درېیو انسټیټونو محصلینو ته په کرنیزو، مالدارۍ او ځنګلونو برخو کې عملي او مسلکي روزنه ورکول کېږي

۱۲ لړم ۱۴۰۵ هـ.ش
۲۲ جُمَادَى الأول ۱۴۴۸ هـ.ق
خوست ولایت کرنې، اوبو لګولو او مالدارۍ ریاست له لوري د درېیو انسټیټونو محصلینو ته د کرنیزو علومو، مالدارۍ او ځنګلونو په برخو کې عملي روزنه وړاندې کېږي.
د خوست مرکز، تڼیو او ځاځي میدان ولسوالیو د درېیو انسټیټونو محصلینو ته له تېرو څو ورځو راهیسې د کرنیزو علومو، نباتي ناروغیو، کرنیزو تحقیقاتو، مالدارۍ، وترنري خدماتو او ځنګلونو د ساتنې په برخو کې عملي روزنیز معلومات وړاندې کوي.
د یاد ریاست متخصصین او مسلکي کارکوونکي محصلینو ته د زراعتي محصولاتو د بسته‌بندۍ او درجه‌بندۍ، په شنو خونو کې د سبزیجاتو د کرنې، د نباتي ناروغیو د پېژندنې او مخنیوي، د کرنیزو څېړنو، د حاصلاتو د ارزونې او د څېړنیزو معلوماتو (ډیټا) د راټولولو په اړه معلومات ورکوي.
همدارنګه، د مالدارۍ او حیواني روغتیا په برخو کې د څارویو د ناروغیو پېژندنه او مخنیوی، د وترنري لابراتوارونو فعالیتونه، د څارویو د مصنوعي القاح تخنیکونه، د څارویو د تغذیې او ساتنې اصول او د حیواني ناروغیو د کنټرول اړوند موضوعات د روزنې په مهمو برخو کې شامل دي.
د ځنګلونو او طبیعي سرچینو په برخه کې هم محصلینو ته د ځنګلونو د ساتنې او احیا، د نیالګیو د تولید، د قوریه‌جاتو د جوړولو او مدیریت، د نیالګیو د روزنې، د ونو د کېنولو او پالنې او د طبیعي سرچینو د دوامدارې استفادې په اړه عملي معلومات وړاندې کېږي.
د دې روزنیز پروګرام موخه د محصلینو د مسلکي پوهې لوړول، د نظري زده‌کړو ترڅنګ د عملي تجربو ترلاسه کولو زمینه برابرول او د کرنې، مالدارۍ او طبیعي سرچینو په برخو کې د هغوی د مسلکي وړتیاوو پیاوړتیا ده.
د یادونې وړ ده، چې دغه روزنیز پروګرام به په راتلونکو څو ورځو کې به هم دوام ولري.