د لغمان د کرنې رییس د ولسونو د ستونزو اورېدو او کرنیز وضعیت ارزونې په موخه بادپښ ولسوالۍ ته سفر وکړ

۱۱ لړم ۱۴۰۵ هـ.ش
۲۱ جُمَادَى الأول ۱۴۴۸ هـ.ق
د لغمان د ولایت مرستیال والي الحافظ انځرګل عبدالله په مشرۍ، چې د کرنې، اوبولګولو او مالدارۍ رییس مولوي سلیمان ایمن، د سکتوري ریاستونو رئیسانو او د مؤسسو مسؤلینو هم ملتیا ورسره کوله، د بادپښ ولسوالۍ ته سفر وکړ.
د یاد سفر په ترڅ کې د لغمان د کرنې، اوبولګولو او مالدارۍ رییس مولوي سلیمان ایمن په یوه پراخه ولسي غونډه کې ګډون وکړ او د کرنې او مالدارۍ د ارزښت په اړه یې خبرې وکړې. نوموړي وویل، چې کرنه او مالداري د هېواد د ملي اقتصاد په پیاوړتیا کې رغنده رول لري او د هېواد شاوخوا ۷۰ سلنه وګړي په دغو برخو کې پر کار بوخت دي.
نوموړي له بزګرانو او مالدارانو وغوښتل، چې د خپلو کرنیزو او مالدارۍ فعالیتونو د پراختیا لپاره لا زیاتې هڅې وکړي، خپل تولیدات زیات کړي او د خپلو کورنیو د اقتصادي وضعیت د ښه والي لپاره کار وکړي. هغه همدارنګه ټینګار وکړ، چې خلک باید د خپلو اقتصادي فعالیتونو د پیاوړتیا لپاره پر خپلو وړتیاوو تکیه وکړي او یوازې بهرنۍ مرستې ته په تمه پاتې نه شي.
د کرنې رئیس د ولسونو ستونزې او غوښتنې واورېدې او د حل په برخه کې یې د همکارۍ ډاډ ورکړ. نوموړي زیاته کړه، چې د بادپښ ولسوالۍ د خلکو ستونزو ته به ځانګړې پاملرنه وشي، څو د هغوی اړتیاوو ته د رسېدنې او د کرنیزو خدمتونو د پراختیا لپاره لازم اقدامات ترسره شي.
همدارنګه، د یاد سفر په ترڅ کې د کرنې رییس د بادپښ ولسوالۍ د کرنیزو چارو مدیریت له کارکوونکو سره جلا ناسته وکړه، د هغوی ستونزې او کاري اړتیاوې یې واورېدې او د حل په برخه کې یې د همکارۍ ډاډ ورکړ.