خوست کې د ممپلو د «تاشکند» ورایټۍ د حاصلاتو او تولیدي وړتیاوو د ارزونې په موخه کرنیزې څېړنې ترسره شوې
۱۰ لړم ۱۴۰۵ هـ.ش
۲۰ جُمَادَى الأول ۱۴۴۸ هـ.ق
د خوست ولایت د کرنې، اوبو لګولو او مالدارۍ ریاست د کرنیزو چارو آمریت اړوند د کرنیزو څېړنو مدیریت له لوري، د جوارسل په څېړنیز فارم کې د ممپلو د «تاشکند» ورایټۍ د ۱۴ لینونو د حاصلاتو او اړوندو معلوماتو د راټولولو بهیر ترسره شو.
د دغه فعالیت موخه د ممپلو د یادې ورایټۍ د حاصلاتو ارزونه، د کرنیزو معلوماتو راټولول او د دې نبات د تولیدي وړتیاوو څېړل دي، څو د کرنیزو څېړنو پر بنسټ د ممپلو د کرکېلې او تولید د لا ښهوالي لپاره اړین معلومات او شواهد چمتو شي.
د خوست ولایت د کرنې، اوبو لګولو او مالدارۍ ریاست هڅه کوي، چې د کرنیزو څېړنو، عملي تجربو او علمي ارزونو له لارې د بېلابېلو کرنیزو نباتاتو تولیدي وړتیاوې وارزوي او د کرنې د ودې، د حاصلاتو د زیاتوالي او د کرنیزو تولیداتو د پیاوړتیا په برخه کې خپل فعالیتونه لا پراخ او پیاوړي کړي.
کرنیزې څېړنې د اصلاح شویو او لوړ حاصل ورکوونکو کرنیزو نباتاتو د پېژندنې، د حاصلاتو د زیاتوالي او د کرنیزو تولیداتو د کیفیت د ښهوالي په برخه کې مهم رول لري. د کرنیزو څېړنو له لارې د بېلابېلو نباتاتو د تولیدي وړتیاوو ارزونه د بزګرانو لپاره د مناسبو کرنیزو ورایټیو په ټاکنه کې مرسته کوي.
