د زابل شاهجوی کې لسګونو بزګرانو ته د اقلیمي بدلون پر وړاندې د سازښت په اړه روزنیز پروګرام وړاندې شو
۴ وږی ۱۴۰۵ هـ.ش
۱۲ رَبِیعُ الْأَوَّل ۱۴۴۸ هـ.ق
د زابل ولایت د شاهجوی ولسوالۍ په کچه ۱۲۰ تنو بزګرانو ته د اقلیمي بدلون له اغېزو سره د سازښت او د کرنیزو او مالدارۍ فعالیتونو د خوندي ساتلو په موخه یوه ورځنۍ ښوونیزه برنامه وړاندې شوه. په دغه پروګرام کې بزګرانو ته د اقلیمي بدلون له ګواښونو سره د مقابلې او د خپلو کرنیزو فعالیتونو د شرایطو له بدلون سره د عیارولو په اړه عملي معلومات ورکړل شول.
په دې ښوونیزه برنامه کې د اقلیمي بدلون، وچکالۍ، د بارانونو د بېنظمۍ او د تودوخې د لوړېدو په اړه معلومات وړاندې شول او د دغو اقلیمي بدلونونو د کرنې او مالدارۍ پر سکتور د اغېزو په اړه له بزګرانو سره خبرې وشوې.
بزګرانو ته د اوبو د سپما، د اوبهخور د مناسبو لارو چارو، د وچکالۍ پر وړاندې د مقاومو نباتاتو د کرلو، د خاورې د ساتنې او د کرنیزو حاصلاتو د خوندي کولو په اړه هم عملي سپارښتنې وشوې، څو د اقلیمي ګواښونو له امله رامنځته کېدونکي زیانونه راکم شي.
د پروګرام له لارې ګډونوالو ته د اقلیمي بدلون سره د سازښت په برخه کې لازم پوهاوی ورکړل شو او د اقلیمي ګواښونو د اغېزو د کمولو لپاره عملي لارې چارې ور وپېژندل شوې. ګډونوالو وویل، چې ترلاسه شوي معلومات به د خپلو کرنیزو فعالیتونو په تنظیم او د اقلیمي ستونزو پر وړاندې د چمتووالي په برخه کې وکاروي.
ځايي بزګرانو، قومي مشرانو، د کلیو ملکانو او ملا امامانو د ورته ګټورو ښوونیزو پروګرامونو د پلي کېدو هرکلی وکړ او ویې ویل، چې د اقلیمي بدلون له امله د رامنځته کېدونکو ستونزو د حل لپاره د خلکو د پوهاوي لوړول اړین دي.
د ناستې په پای کې د شاهجوی ولسوالی د کرنې او مالدارۍ اړوند د ستونزو د حل لپاره یو شمېر وړاندیزونه هم مطرح شول، چې له ډلې یې د اصلاح شوو تخمونو برابرول، د اوبو د سپما لپاره د چکډېمونو جوړول او د بڼونو د خړوبولو په موخه د څاڅکي اوبهخور سیستمونو رامنځته کول وو.
