د ننګرهار په کوټ ولسوالی کې ۳۰ اړمنو کورنیو ته دوه کلنې بلاربې خوسکۍ ووېشل شوې

۲۵ زمری ۱۴۰۵ هـ.ش
۲ رَبِیعُ الْأَوَّل ۱۴۴۸ هـ.ق
د ننګرهار د کرنې، اوبو لګولو او مالدارۍ ریاست په هڅو، د ډاکار مؤسسې په تخنیکي همکارۍ او د «ډانیډا»مؤسسې  په مالي ملاتړ، د کوټ ولسوالی ۳۰ بې وزلو او اړمنو کورنیو ته دوه کلنې بلاربې خوسکۍ ووېشل شوې.
د خوسکیو د وېش په مراسمو کې د ننګرهار د کرنې، اوبو لګولو او مالدارۍ رییس مولوي عبدالستار محمد وویل، چې دغه پروګرام د بې وزلو کورنیو د اقتصادي وضعیت د ښه والي، د مالدارۍ د ودې او د هغوی د کورنیو د لومړنیو اړتیاوو د پوره کولو په موخه عملي شوی دی.
هغه زیاته کړه، چې د تر دې مخکې د چپرهار ولسوالی ترڅنګ پر لسګونو کورنیو هم ورته مرستې وېشل شوې او په نږدې راتلونکې کې به د روداتو ولسوالی لسګونو نورو اړمنو کورنیو ته هم ورته مرستې، په ځانګړي ډول بلاربې خوسکۍ، ووېشل شي.
مولوي عبدالستار محمد همدارنګه یادونه وکړه، چې له دې وړاندې د یادو کورنیو د مالدارۍ د پیاوړتیا او د څارویو د مناسبې ساتنې په موخه د جوارو او شفتلې اصلاح شوي تخمونه، کیمیاوي سرې او یو شمېر کرنیز وسایل هم وېشل شوي وو، ترڅو د مالدارۍ د دوامدار پرمختګ لپاره لازم شرایط برابر شي.
په همدې حال کې د ډاکار مؤسسې د زون مسوول انجینر جواد رفیقي د ننګرهار د کرنې ریاست له همکارۍ څخه مننه وکړه او ویې ویل، چې د پروژو په بریالي او شفاف تطبیق کې د یاد ریاست همکاري د ستاینې وړ ده.
ښاغلي رفیقي څرګنده کړه، چې د خوسکیو د وېش اساسي موخه د بې وزلو کورنیو اقتصادي ملاتړ، د مالدارۍ سکټور پیاوړتیا او په سیمه کې د خوړو د خوندیتوب کچې لوړول دي.
نوموړي زیاته کړه، چې تېر کال هم د ډاکار مؤسسې له لوري په ننګرهار ولایت کې سلګونو بې وزلو کورنیو ته د خوسکیو مرستې ترسره شوې وې، چې د هغوی د اقتصادي پیاوړتیا، د کورنیو د عاید د زیاتوالي او د مالدارۍ د پراختیا په برخه کې یې مثبتې او اغېزمنې پایلې لرلې.
د کرنې، اوبو لګولو او مالدارۍ وزارت د هېواد په بېلابېلو ولایتونو کې د مالدارۍ سکټور د پیاوړتیا، د بې وزلو کورنیو د اقتصادي وضعیت د ښه والي او د خوړو د خوندیتوب د تأمین په موخه د کورنیو او نړۍوالو همکارو مؤسسو په ملاتړ د مالدارۍ او کرنې بېلابېلې پراختیايي پروژې پلي کوي. د دغو پروګرامونو له لارې اړمنو کورنیو ته د مالدارۍ اړوند مرستې، کرنیز توکي او مسلکي روزنې برابرېږي، ترڅو د هغوی د عاید کچه لوړه او پر ځان بسیاینې ته لاره هواره شي