کونړ کې ۴۰ بزګرانو ته د جوارو او لوبیا د ننداریزو کروندو پهپار اصلاح شوي تخمونه ووېشل شول
۱ چنګاښ ۱۴۰۵ هـ.ش
۶ مُحَرَّمُ الحَرام ۱۴۴۸ه.ق
د کرنې، اوبو لګولو او مالدارۍ وزارت دپراختیایي بودیجې په چوکاټ کې د کونړ ولایت د کرنې، اوبو لګولو او مالدارۍ ریاست د کرنیزو خدماتو د ترویج آمریت له لوري ۴۰ بزګرانو ته د جوارو او لوبیا د ننداریزو کروندو د جوړولو پهپاراصلاح شوي تخمونه ووېشل شول.
د یاد پروګرام له مخې، ۲۵ بزګرانو ته د جوارو او ۱۵ بزګرانو ته د لوبیا د ننداریزو کروندو د کرلو لپاره اصلاح شوي تخمونه ورکړل شول. په دې لړۍ کې هر بزګر ته ۸ کیلوګرامه د جوارو او ۲۰ کیلوګرامه د لوبیا اصلاح شوي تخمونه ووېشل شول.
د تخمونو د وېش لړۍ د کونړ ولایت د کرنې، اوبو لګولو او مالدارۍ چارسمبال محمدالله فاروقي په حضور کې په رسمي ډول پرانیستل شوه. نوموړي په خپلو خبرو کې وویل، د ننداریزو کروندو له لارې به بزګران د نوې ټکنالوژۍ، اصلاح شویو تخمونو او معیاري کرنیزو میتودونو عملي تجربه ترلاسه کړي، چې پایله به یې د جوارو او لوبیا د حاصلاتو زیاتوالی او د سیمې د کرنیزو تولیداتو وده وي.
هغه زیاته کړه، یادې کروندې به د نورو بزګرانو لپاره هم د عملي زدهکړو ښه بېلګې وي او د عصري کرنې د دودولو په برخه کې به مهم رول ولوبوي.
همدارنګه د کرنې ریاست تخنیکي سلاکارانو بزګرانو ته د کتاري کرنې د ارزښت او ګټو په اړه مسلکي معلومات وړاندې کړل او هغوی یې وهڅول، چې د عصري کرنې طریقې خپلې کړي. دوی له بزګرانو وغوښتل، چې ورکړل شوي اصلاح شوي تخمونه او کیمیاوي سرې د کرنې ریاست د مسلکي ټیم د لارښوونو او سپارښتنو سره سم په خپلو کروندو کې وکاروي، ترڅو غوره پایلې ترلاسه کړي.
د یادونې وړ ده، چې د دې پروګرام په راتلونکو پړاوونو کې به ګډونوالو بزګرانو ته د سپېنې او تورې کیمیاوي سرې سربېره د کرنیزو فعالیتونو د ملاتړ په موخه هر بزګر ته ۱۰۰۰ افغانۍ نغدي مرسته هم ورکړل شي. د دې پروګرام موخه د جوارو او لوبیا د حاصلاتو لوړول، د اصلاح شویو تخمونو ترویج او د عصري کرنیزو تخنیکونو عملي معرفي کول دي.
