کونړ کې د نیالګیو اېښودو کمپاین پیل شو
۲۰ سلواغه ۱۳۹۸
د کونړ د کرنې، اوبولګولو او مالدارۍ ریاست وایي، چې په دې ولایت کې د نیالګیواېښودو کمپاین پیل شوی دی، چې په ترڅ کې به یې ددې ولایت په بېلابېلو سیمو کې څه باندې یو میلیون مثمر او غیر مثمر نیالګي کېښودل شي.
د کونړ د کرنې، اوبولګولو او مالدارۍ ریاست چارواکي وایي، چې سږ د کونړ په دولتي او شخصي قوریو کې یو میلیون او ۱۸۸ زره او ۷۳۰ نیالګي د وېش په پار چمتو شوي دي.
د چارواکو په خبره له دې ډلې ډېر شمېر نیالګي یې د کونړ د کرنې، اوبولګولو او مالدارۍ ریاست په قوریو کې تولید شوي، چې د طرزالعمل او لایحې مطابق به یې دولتي ځایونو، عامه المنفعه سیمو، ښوونځیو او مدرسو ته د قید او جمع نه وروسته د ګډ پلاوي په شتون کې ووېشل شي.
د کونړ د کرنې ریاست چارواکي ډاډ څرګند کړ چې د نیالګیو تر وېشلو وروسته د ساتنې په موخه د ولایت مقام په مشرۍ د چاپېریال ساتنې او شاروالۍ ادارو سره په ګډه ځانګړی میکانیزم جوړوي ترڅو په سمه توګه د نیالګیو ساتنه وشي.
په ورته وخت کې د کونړ د کرنې ریاست له خوا سږ کال په دې ولایت کې د مېوې څه باندې زر جریبه بڼونه هم جوړیږي.
د کونړ د کرنې ریاست وایي، چې سږ کال به په دې ولایت کې د بېلابېلو مېوو یو زر او ۱۶ جریبه نوي بڼونه جوړ شي.
دکونړ د کرنې ریاست د چارواکو په خبره د مېوو نوي بڼونه جوړول په دې ولایت کې د بڼوالۍ په برخه کې لوی پرمختګ دی.
د کرنې وزارت هلې ځلې کوي، چې کونړ ولایت کې بڼوالۍ ته وده ورکړي، هغه ونې ترویج کړي، چې په لنډه موده کې مېوه نیسي او ښه کمیت او کیفیت لرونکي وي، تر څو د بڼوالۍ محصولات ډېر او د بڼوالو عواید زیات شي.
د کرنې وزارت له خوا د نوي بڼونو جوړول، د زړو بڼونو بیارغول او پر بڼوالو د بڼوالۍ اړونده توکي وېشل د بڼوالۍ د سکټور د پیاوړتیا او د نوي بڼونو د پېژندنې لامل شوي دي او له دې لارې بزګرانو ته د کار زمینه هم برابره شوې ده.
