د ډیورنډ فرضي کرښې له لاري پاکستان ته د سلګونو پسونو د قاچاق مخه نیول شوې
۴ غبرګولی ۱۴۰۵ه.ش
۸ ذُو الحِجَّةِ ۱۴۴۷ه.ق
د کندهار د کرنې، اوبو لګولو او مالدارۍ ریاست اړوند، د مالدارۍ آمریت چارواکي وایي، چې دمعروف ولسوالی د کرنې او مالدارۍ مسؤلینو او امنیتي ارګانونو د ویښو او بیدارو مجاهدینو په ګډه همکارۍ، پاکستان ته د۵۱۳ پسونو د قاچاق مخه نیول شوې ده.
د معروف ولسوالی مسؤلین زیاتوي، چې یو شمېر کسانو هڅه کوله یاد شمېر پسونه د معروف ولسوالی د فرضي کرښې له لاري په غیرقانوني او قاچاقي ډول پاکستان ته انتقال کړي، چې پرمهال یې د مالدارۍ او امنیتي مسؤلینو پر وخت اقدام وکړ او د قاچاق مخه یې ونیول. د دې قاچاق په تړاو اته کسان هم نیول شوي، چې د نورو څېړنو لپاره اړوندو ارګانونو ته سپارل شوي دي.
د یادونې وړ ده، چې په دې وروستیو کې د قاچاقي څارویو د مخنیوي په موخه د کندهار د کرنې ریاست، امنیه قوماندانۍ او اړوندو امنیتي مسؤلینو ګډې هڅې زیاتې شوي دي. چې د همدې هڅو په دوام، تر دې وړاندې هم د زرګونو پسونو د قاچاق مخه نیول شوې وه، او مسؤلین وایي چې په راتلونکي کې به د څارویو د قاچاق پر وړاندې دا ډول کمپاینونه لا هم پیاوړي کړي.
