د خوست سپېرې ولسوالی کې لسګونو بزګرانو ته د لوبیا تخمونه او کیمیاوي سرې ووېشل شوې

۲ غبرګولی ۱۴۰۵ه‍.ش
۶ ذُو الحِجَّةِ ۱۴۴۷ه‍.ق
د خوست ولایت د کرنې، اوبو لګولو او مالدارۍ ریاست اړوند د کرنیزو چارو عمومي مدیریت تر مستقیم نظارت لاندې او د «اوآرډي» مؤسسې په همکارۍ، د سپېرې ولسوالی په درېیو کلیو؛ تني‌خېل، قلعه او خیان کې ۵۵ تنه مستحق بزګران انتخاب او ورسره لازمې کرنیزې مرستې ترسره شوې.
د یاد پروګرام په ترڅ کې هر بزګر ته ۱۵ کیلوګرامه د لوبیا اصلاح شوی تخم، ۱۵ کیلوګرامه توره سره او ۱۵ کیلوګرامه سپینه سره ووېشل شوه، څو بزګران وکولای شي خپلې کرنیزې چارې په معیاري ډول پر مخ یوسي او د خپلو حاصلاتو کچه لوړه کړي.
همدارنګه، د «اوآرډي» مؤسسې مسؤلینو د کرنیزو چارو عمومي مدیریت د مسؤلینو په حضور کې بزګرانو ته د لوبیا د کرکېلې، مناسبې پالنې، د ناروغیو مخنیوي او د غوره حاصلاتو ترلاسه کولو په اړه تخنیکي لارښوونې او عامه پوهاوی وړاندې کړ.
د مسؤلینو په وینا، د دغه پروګرام اساسي موخه د بزګرانو ملاتړ، د کرنیزو تولیداتو زیاتوالی او د هغوی د اقتصادي وضعیت پیاوړتیا ده، څو بزګران وکولای شي د اقلیمي بدلونونو او اقتصادي ننګونو پر وړاندې ښه مقاومت ولري او په سیمه کې د کرنې سکتور لا پراخ او پیاوړی شي.
د کرنې، اوبو لګولو او مالدارۍ وزارت د هېواد په بېلابېلو سیمو کې د بزګرانو د ملاتړ، د کرنیزو حاصلاتو د زیاتوالي او د خوړو خوندیتوب د پیاوړتیا په موخه د کورنیو او نړۍوالو همکارو مؤسسو په همغږۍ بېلابېل کرنیز پروګرامونه پلي کوي. دغه پروګرامونه د اصلاح شوو تخمونو او کیمیاوي سرو دوېش او دغه راز تخنیکي روزنیزو پروګرامونو وړاندې کولو له لارې بزګرانو سره مرسته کوي، څو د اقلیمي بدلونونو او اقتصادي ستونزو پر وړاندې د هغوی مقاومت لوړ شي.