د خوست قلندر ولسوالی په ځنګلي سیمو کې د نباتي افت د تشخیص او ارزونې په موخه سیمه ییز سروې ترسره شوه

۲۴ غویی ۱۴۰۵ه‍.ش
۲۷ ذُو ٱلْقَعْدَةِ ۱۴۴۷ه‍.ق 
د خوست ولایت کرنې، اوبو لګولو او مالدارۍ ریاست اړوند د کرنیزو چارو آمریت اړوند د بوټو ساتنې او قرنطین عمومي مدیریت تخنیکي ټیم له لوري د قلندر ولسوالی په ځنګلي سیمو کې د رامنځته شوي نامعلوم نباتي افت د تشخیص او ارزونې په موخه سیمه ییز سروې ترسره شوه.
یاده سروې د روانو کرنیزو اندېښنو د حل او د افت د نوعیت د پېژندنې لپاره د متخصصو کارکوونکو له لوري ترسره شوې، چې په ترڅ کې انجنیر میرنواز علمي، انجنیر شاکرالله او انجنیر محمد غفورشاه د یادې ولسوالۍ اړوندو ځنګلي سیمو ته سفر وکړ.
د سروې پر مهال د نباتاتو وضعیت له نږدې وڅېړل شو، د افت نښې نښانې ثبت شوې او د لا دقیق لابراتواري تشخیص لپاره اړینې نمونې هم راټولې شوې. د یاد اقدام موخه دا ده چې د افت د خپرېدو مخنیوی وشي او پر وخت مناسبه وقایوي او کنټرولي تګلاره جوړه شي.
د خوست د کرنې ریاست رهبري ډاډ ورکوي، چې د کرنیزو نباتاتو د ساتنې او د هر ډول افتونو پر وړاندې د اغېزمنو اقداماتو لپاره خپلې هڅې جاري ساتي، ترڅو د سیمې طبیعي شتمنۍ خوندي او د بزګرانو اقتصادي وضعیت پیاوړی شي.