د خوست صبریو او یعقوبیو کې پر لسګونو بزګرانو د سویابینو تخم او کیمیاوي سرو وېش لړۍ پیل شوه
۱۶ غویی ۱۴۰۵ه.ش
۱۹ ذُو ٱلْقَعْدَةِ ۱۴۴۷ه.ق
د خوست د کرنې، اوبولګولو او مالدارۍ ریاست له لوري، د ملګرو ملتونو پراختیایي پروګرام «یوانډيپي» په مالي او د «اوآرډي» مؤسسې په تخنیکي همکارۍ، دخوست ولایت د صبریو او یعقوبیو ولسوالی اړوند بېلابېلو کلیو کې لسګونو بزګرانو ته د سویابینو تخم او کیمیاوي سرو د وېش لړۍ پیل شوه.
په دې مرسته کې هر بزګر ته د یو جریب ځمکې لپاره ۲۰ کیلوګرامه د سویابینو تخم، ۲۵ کیلوګرامه توره سره او ۲۵ کیلوګرامه سپینه سره ورکول کېږي.
د یادو مرستو د وېش پرانیسته د خوست دکرنې ریاست د ترویج کارکوونکو او د یادې مؤسسې استازو په حضور کې په رسمي ډول پیل شوه.
همداراز، د خوست دکرنې ریاست له لوري بزګرانو ته د سویابینو د کرنې اړوند مهمې لارښوونې وشوې، چې پکې د کرکېلې لارې چارې، د ناروغیو مخنیوی، د سرو کارونه، اوبه لګونه، د هرزه بوټو کنټرول، د حاصلاتو راټولول او نور اړوند موضوعات شامل و.
