د زیتونو د تولید د پراختیا هڅې؛ ننګرهار کې د زیتونو بڼونه د پام وړ ودې ته رسېدلي
۱۴ غویی ۱۴۰۵ه.ش
۱۷ ذُو ٱلْقَعْدَةِ ۱۴۴۷ه.ق
د کرنې، اوبو لګولو او مالدارۍ وزارت په وروستیو کلونو کې د زیتونو بڼونو د جوړولو او د زیتونو د تولید د پراختیا لپاره خپلې هڅې لا ګړندۍ کړې دي، چې په پایله کې یې په بېلابېلو ولایتونو، په ځانګړي ډول ننګرهار کې د زیتونو بڼونه د پام وړ ودې ته رسېدلي دي.
په همدې لړ کې، د د ننګرهار وادي کرنیز امارتي شرکت چارواکي وایي، چې د هډې فارم درېیم بلاک کې د زیتونو بڼونه دا مهال په ښه وضعیت کې دي او ټوله ساحه د شنو زیتونو ونو له امله ځانګړې ښکلا خپله کړې ده.
د درېیم بلاک د مسؤل مدیر د معلوماتو له مخې، په دې بلاک کې شاوخوا ۸۰۰ جریبه ځمکه د زیتونو بڼونو ته ځانګړې شوې، چې ونې یې دا مهال په مناسبه وده کې دي او د ښه حاصل ورکولو تمه ترې کېږي.
نوموړي زیاته کړه، د ننګرهار وادي کرنیز شرکت د رهبرۍ د دوامداره پاملرنې او ملاتړ له امله هیله ده، چې په روان کال کې به له یادو بڼونو څخه د زیتونو د پام وړ حاصلات ترلاسه شي، چې دا به د کرنیزو عوایدو په لوړولو کې مهم رول ولوبوي.
دا په داسې حال کې ده، چې د ننګرهار وادي کرنیز شرکت په خپلو بېلابېلو فارمونو کې د بڼوالۍ او کرنې د پراختیا لپاره پراخې هڅې روانې ساتلې دي. یادې هڅې نه یوازې د زیتونو د تولید د زیاتوالي لامل ګرځي، بلکې د هېواد د اقتصادي پیاوړتیا، د کارموندنې رامنځته کېدو او د کورنیو تولیداتو د ودې په برخه کې هم مهم اغېز لري.
