د کندهار نوروزي څېړنیز فارم کې د ۸ میلیونه افغانیو په ارزښت د اوبو لګولو پروژې چارې پیل شوې
۱۳ غویی ۱۴۰۵ه.ش
۱۶ ذُو ٱلْقَعْدَةِ ۱۴۴۷ه.ق
د کندهار د کرنې، اوبو لګولو او مالدارۍ ریاست له خوا د ترکیې د همکارۍ او همغږۍ ادارې «ټیکا» په مالي ملاتړ او د نوروزي څېړنیز فارم د مسؤلینو تر څارنې لاندې، په یاد فارم کې د اوبو ستونزې د حل په موخه د شاوخوا اته میلیونه افغانیو په ارزښت د یوې مهمې پروژې عملي چارې پیل شوې.
د نوروزي څېړنیز فارم مسؤل ملا فتح محمد فیضي وویل، چې د دغې پروژې ټول لګښت د ترکیې د ټیکا کمپنۍ له لوري ورکول کېږي، چې په ترڅ کې به یې دوه ژورې برمې وکېندل شي، د اوبو د زېرمه کولو لپاره به یوه لویه زېرمه جوړه شي، د اوبو سپما لپاره به منظم او عصري د اوبو لګولو سیستم نصب شي او همداراز به د وسایطو د ساتنې لپاره یوه ځانګړې خونه هم جوړه شي.
هغه زیاته کړه، د دې پروژې اساسي موخه پر ۳۰۰ جریبه ځمکه د لمرګلي نبات کرنه، د کرنیزو تولیداتو پراختیا او د نباتي غوړیو تولید ته زمینه برابرول دي. د نوموړي په وینا، په راتلونکې کې به په همدې فارم کې د غوړیو د تولید لپاره یوه فابریکه هم جوړه شي.
د کندهار د کرنې ریاست چارواکي وایي، د دغو زېربنایي پروژو پلي کېدل به د څېړنیزو فارمونو د ظرفیت لوړولو، د کرنیزو محصولاتو د زیاتوالي او د بزګرانو لپاره د نوو اقتصادي فرصتونو په رامنځته کولو کې مهم رول ولوبوي.
د یادونې وړ ده، چې تېر کال هم په کندهار نوروزي څېړنیز فارم کې د لمرګلي نبات بریالۍ ازمایښتي کرنه ترسره شوې وه، چې ښې پایلې یې لرلې.
