د کندهار لوړ میوند ولسوالی کې ۱۳۵ اړمنو بزګرانو ته د جوارو اصلاح شوي تخمونه او کیمیاوي سرې ووېشل شوې
۱۰ غویی ۱۴۰۵ه.ش
۱۳ ذُو ٱلْقَعْدَةِ ۱۴۴۷ه.ق
د کندهار ولایت د کرنې، اوبو لګولو او مالدارۍ ریاست په هڅو، د ملګرو ملتونو د خوړو او کرنې ادارې «افاېاو» په مالي ملاتړ، د کندهار کډوالو مؤسسې «کېاراو» په تخنیکي همکارۍ او د لوړ میوند ولسوالی د کرنې او مالدارۍ مسؤلینو تر څارنې لاندې، د یادې ولسوالی ۱۳۵ تنه بېوزلو او اړمنو بزګرانو ته د جوارو اصلاح شوي تخمونه او کیمیاوي سرې ووېشل شوې.
د لوړ میوند ولسوالی مسؤلینو وویل، چې د مرستو د عادلانه وېش لپاره لومړی د مستحقو بزګرانو د نوملیکنې بهیر ترسره شو او وروسته هر بزګر ته ۱۲ کیلوګرامه د جوارو اصلاح شوی تخم، ۵۰ کیلوګرامه سپینه سره، ۵۰ کیلوګرامه توره سره او یوه د هارمینګ کڅوړه ورکړل شوه.
د دغو مرستو اساسي موخه د بزګرانو اقتصادي ملاتړ، له کمو ځمکو څخه د زیاتو حاصلاتو ترلاسه کول، د جوارو کرکېلې پراخول او د اصلاح شويو تخمونو دودول بلل شوي دي، څو بزګران وکولای شي خپل تولیدات زیات او اقتصادي وضعیت ښه کړي.
د کندهارد کرنې ریاست چارواکي وایي، چې د لوړ میوند ولسوالی ترڅنګ د کندهار په دامان، ډنډ او یو شمېر نورو ولسوالیو کې هم د ورته مرستو د وېش لپاره د نوملیکنې لړۍ بشپړه شوې ده او ټاکل شوې، چې په نږدې راتلونکې کې هلته هم د جوارو تخمونه او کیمیاوي سرې ووېشل شي.
تمه ده، چې د دغو مرستو په پلي کېدو سره به په کندهار ولایت کې د جوارو تولید زیات، د بزګرانو عواید لوړ او د کرنې سکټور د لا پیاوړتیا زمینه برابره شي.
