هلمند کې یوشمېر بڼوالو ته د انارو مچ د مخنیوي په اړه روزنه ورکړل شوه
۹ غویی ۱۴۰۵ه.ش
۱۲ ذُو ٱلْقَعْدَةِ ۱۴۴۷ه.ق
د هلمند ولایت د کرنې، اوبولګولو او مالدارۍ ریاست د کرنیزو چارو امریت اړوند، د بوټو ژغورنې او قرنطین عمومي مدیریت مسلکي کارکوونکو د چانجیر په سیمه کې یو شمېر بڼوالو ته د انار مچ د مخنیوي په اړه عملي او نظري روزنه ورکړه.
په دې روزنه کې بڼوالو ته د انار مچ د زیانونو، د خپرېدو لارو او د مخنیوي میخانیکي او کیمیاوي لارو چارو په اړه بشپړ معلومات وړاندې شول.
مسؤلینو څرګنده کړه، چې د انار مچ د نړۍ له خورا زیان رسوونکو افتونو څخه شمېرل کېږي، چې د انارو د ګل او مېوې د له منځه تلو، د حاصل د کمښت او د کیفیت د خرابېدو سبب ګرځي.
همداراز بڼوالو ته سپارښتنه وشوه، چې د منې او ژمې په موسم کې د بڼونو پاکوالي ته ځانګړې پاملرنه وکړي، ورستې مېوې له منځه یوسي، پر وخت سره او اوبه ورکړي او د حشراتو د له منځه وړلو لپاره منظم درمل پاشي ترسره کړي، ترڅو د افتونو مخنیوی وشي او ښه، باکیفیته او اقتصادي حاصل ترلاسه کړي.
