د هلمند د انارباغ نیالګیو روزلوقوریه کې د سلګونو زرو نیالګیو د تخمونو کرلو چارې پای ته ورسېدې

۳۰ وری ۱۴۰۵ه‍.ش
۲ ذُو ٱلْقَعْدَةِ ۱۴۴۷ه‍.ق
د هلمند ولایت د کرنې، اوبو لګولو او مالدارۍ ریاست اړوند د قدرتي سرچینو امریت له لوري، د انارباغ قوریه کې د نیالګیو د تولید او روزنې په موخه پراخ فعالیتونه ترسره شوي دي.
د یادو هڅو په ترڅ کې په ۴۰۰۰ پلاستیکي کڅوړو کې ۵ کیلو د مصري بید تخم کرل شوي، په ۴۷۸۸ پلاستیکي کڅوړو کې درې کیلو د ګل‌بید تخم کرل شوی او همدارنګه په ۵۰۰۰ پلاستیکي کڅوړو کې پنځه کیلو د یوکلپتوس بید تخم کرل شوی دی.
سربېره پر دې، پنځه کیلو د پستې تخم، څلور کیلو د مورفانګ تخم، دوه کیلو د سروې تخم او ۱۰ کیلو د ناجو تخم هم کرل شوي دي.
همدارنګه د ۲۰۰۰۰ پیوندي نیالګیو اصلاح هم ترسره شوې، چې له امله به یې په راتلونکې کې په سلګونو زره نیالګي تولید او وروزل شي.
باید وویل شي، چې دغه هڅې د شنوسیمو د پراختیا، د چاپېریال ساتنې او د اقتصادي ودې په برخه کې مهم ګام بلل کېږي.