خوست کې د کار په بدل کې د نغدو پیسو ور کړې پروژې د ۵۰۰ ټرینچونو چارې بشپړې شوې
۲۹ وری ۱۴۰۵ه.ش
۱ ذُو ٱلْقَعْدَةِ ۱۴۴۷ه.ق
د خوست ولایت د کرنې، اوبو لګولو او مالدارۍ ریاست تر چتر لاندې، د صبریو او یعقوبیو ولسوالی د کرنیزو چارو عمومي مدیریت په مستقیمه څارنه، او د ويرو مؤسسې په همکارۍ، د یادې ولسوالی اړوند د اباد خانې په سیمه کې د کار په بدل کې د نغدو پیسو یوه مهمه پروژه په بریالیتوب سره بشپړه شوه.
یاده پروژه، چې د اوبو د مدیریت او کرنیزو ځمکو د ساتنې په موخه طرحه شوې وه، پکې ټولټال شاوخوا ۵۰۰ ټرینچونه (کندې) وکېندل شول، چې د باراني اوبو د مهارولو، د ځمکې د تخریب مخنیوي او د کرنیزو حاصلاتو د ښه والي لپاره مهم رول لري.
په دې پروژه کې اولس سیمه ییزو کاریګرو برخه اخیستې وه، چې د څو کاري ورځو په موده کې یې په دوامداره توګه کار ترسره کړ. د کار په بدل کې هر کارګر ته د ورځې ۳۵۰ افغانۍ ورکړل شوې، چې نه یوازې یې د سیمې خلکو ته لنډمهاله کاري زمینه برابره کړه، بلکې د هغوی د اقتصادي وضعیت په ښه والي کې یې هم اغېزناک رول ولوباوه.
دغه ډول پروژې د کلیوالي سیمو د بنسټیزو اړتیاوو د پوره کولو تر څنګ، د قدرتي سرچینو د ساتنې، د اقلیمي بدلونونو پر وړاندې د مقاومت زیاتولو او د خلکو د عایداتو د لوړولو لپاره مهم ګام بلل کېږي.
د خوست ولایت د کرنې، اوبو لګولو او مالدارۍ ریاست رهبري ژمنه ده، چې د ورته ګټورو پروژو پلي کول به دوام ولري، ترڅو د کرنې سکتور پیاوړتیا او د بزګرانو د ژوند د شرایطو ښه والی یقیني شي.
