د لغمان د کرنې رییس د سرف افغانستان مؤسسې د پروژو له مسؤل سره وکتل
د لغمان د کرنې، اوبو لګولو او مالدارۍ رییس مولوي سلیمان ایمن دخپل کار په دفتر کې د سرف افغانستان د پروژو له مسؤل سره د یوې نوې پروژې د اغېزمنې همغږۍ په موخه وکتل.
په دې کتنه کې د یادې مؤسسې د پروژو مسؤل، انجنیر محمد صابر عالیمې څرګنده کړه، چې د اګرو فاریسټري په برخه کې یوه نوې پروژه د درېیو کلونو لپاره منظوره شوې ده، چې د دې پروژې له لارې به د قرغیو ولسوالی په کچه د نیالګیو لاندې د حبوباتو، غلهجاتو او سبو کرنه ترسره شي. نوموړي د یادې پروژې موخې، فعالیتونه او اهمیت تشریح کړ او د هغې د بریالي تطبیق په برخه کې یې د همکارۍ غوښتنه وکړه.
د لغمان د کرنې رییس مولوي سلیمان ایمن د سرف افغانستان مؤسسې مسؤلینو ته ښه راغلاست ووایه او د هغوی له هڅو یې مننه وکړه، چې د کرنې او بڼوالۍ د پراختیا لپاره یې کوي.
نوموړي یاده پروژه د کروندګرو د اقتصادي ثبات، د یوې واحدې ځمکې څخه د څو حاصلاتو د ترلاسه کولو او د تولید د لوړوالي په برخه کې مهمه وبلله.
همداراز، ښاغلي ایمن د اسلامي امارت د اصولو په چوکاټ کې د هر ډول همکارۍ ډاډ څرګند کړ.
