دهلمند ولایت کرنې ریاست اړوند څېړنیز فارم کې لسګونه کرنیزې تجربې تر لاس لاندې دي
۱۳ وری ۱۴۰۵ه.ش
۱۵ شَوّالُ المُکَرَّم ۱۴۴۷ه.ق
د هلمند ولایت د کرنې، اوبو لګولو او مالدارۍ ریاست اړوند، د بولان څېړنیز فارم کې د نوي کال له پیل سره سم بېلابېلې کرنیزې چارې په منظم ډول روانې دي.
په دې لړ کې، د نخودو دوه ډوله تجربې پلي شوې، ترڅنګ یې د نخودو، زغرو او شړشمو مورنيو تخمونو باندې د عملي څیړنو لړۍ دمسلکي کارمندانو لخو روانه ده. همداراز، د غنمو د تجربو معلومات هم بشپړ شوي دي.
ددې ترڅنګ په دغه فارم کې د غنمو د مورنيو او هستوي تخمونو په کرنیزو قطعو کې د خشاوې چارې لا هم په دوامداره توګه روانې دي.
له بلې خوا، د مېوجاتو د کلکسیونونو په برخه کې د انارو شل ۲۰ او د انګورو ۲۵ ډولونه د لا ښو څېړنو په موخه ساتل کېږي او ترڅنګ یې په اړوندو باغونو، قوریو او شنو خونو کې د سبزیجاتو روزنه هم په ښه توګه دوام لري.
سربېره پر دې د یاد فارم په بله برخه کې، د پنبې، بېنډیو، بانجانو، مصور او پیازو د کرنې لپاره د پلان د تطبیق په موخه د ځمکو شیدياره کول او ډیزاین برابرول ترسره شوي دي چې راتلونکې به ورباندې لازمې څیړنې ترسره شي.
د هلمند د کرنې ریاست هڅه کوي، چې په یاد څېړنیز فارم کې د کرنیزو تجربو د ښه والي، د اصلاح شویو تخمونو د تولید او د کرنې سکتور د پیاوړتیا په موخه لا نور پرمختګ او بهبود هم رامنځته کړي.
