پکتیا کې د شاتو پلورنځیو څخه څارنه ترسره شوه
۱۸ کب ۱۴۰۴ه.ش
۲۰ رَمَضانُ المُبارَک ۱۴۴۷ه.ق
د پکتیا ولایت د کرنې، اوبو لګولو او مالدارۍ ریاست د یو ګډ تخنیکي کمیسیون په ګډون، د کرنې، اوبو لګولو او مالدارۍ وزارت د هدایت پر بنسټ، د مرکز ګردېز په یو شمېر د شاتو پلورنځیو کې د څارنې او ارزونې پروسه ترسره کړه.
یاده څارنه د بېکیفیته او غیرقانوني شاتو د پلور او استعمال د مخنیوي او همدارنګه د هغو شاتو د بازار څخه راټولولو په موخه ترسره شوه چې د وزارت اړوند لابراتوارونو د ټېسټ سند نه لري.
د ترسره شوې څارنې په پایله کې د مرکز ګردېز له یو شمېر پلورنځیو څخه شاوخوا ۳۵ کیلوګرامه بېکیفیته شات راټول او له بازار څخه لیرې کړل شول.
اړوند مسؤولین وایي، چې دا پروسه به تر هغه وخته دوام ومومي ترڅو د بېکیفیته او غیرمعیاري شاتو د پلور مخه په بشپړ ډول ونیول شي.
د یادونې وړ ده، چې د یاد کمیسیون له لوري د شاتو پلورونکو ته د معیاري محصولاتو د پلور، د قانوني جوازونو د ترلاسه کولو او د کیفیت د ساتنې په اړه لازمې سپارښتنې او لارښوونې هم وشوې.
