لغمان کې د ۱۵ هکټاره چهارمغزو مصنوعي ځنګل د جوړېدو پروژه پیل شوه
۱۵ سلواغه ۱۴۰۴ه.ش
۱۶ شَعبان المُعَظّم ۱۴۴۷ه.ق
د لغمان د کرنې، اوبولګولو او مالدارۍ ریاست د پراختیايي پروژو له لارې، د دغه ولایت په الینګار، الیشنګ او دولتشاه ولسوالیو کې د ۱۵ هکټاره مصنوعي ځنګل د جوړولو په موخه د شپږ زره نیالګیو د وېش لړۍ پیل شوه.
یاده لړۍ د لغمان د کرنې رییس، مولوي سلیمان ایمن، په لارښوونه، د کرنې ریاست د استازو او ولایتي پلاوي په حضور کې، د الینګار ولسوالی له داوطلبو اشخاصو سره د نیالګیو په وېشلو رسماً پیل شوه.
د یاد شمېر نیالګیو پاتې برخه به په ترتیب سره د الیشنګ او دولتشاه ولسوالیو ټاکل شوو سیمو خلکو ته هم ووېشل شي.
د یادونې وړ ده، چې دغه پروژه د ځنګلونو د بیارغونې او د چهارمغزو د طبیعي ځنګلونو د پراختیا په موخه تطبیقېږي، چې په پایله کې به ۱۵ هکټاره مصنوعي ځنګل رامنځته شي.
