ننګرهار کې د معیاري او عصري مسلخ د جوړېدو هوکړه لاسلیک شوه
۱۴ سلواغه ۱۴۰۴ه.ش
۱۵ شَعبان المُعَظّم ۱۴۴۷ه.ق
د ننګرهار وادي کرنیز شرکت په ځمکه د یو معیاري او عصري مسلخ د جوړېدو په موخه د هوکړه لاسلیک شوه.
یاده هوکړه د ننګرهار وادي کرنیز شرکت د اجرائیوي رییس سېد محمد نعیم محمدي او د غوښو او لبنیاتو د امارتي مسلخ شرکت د رییس قاري رحمتالله عباس ترمنځ لاسلیک شوې ده.
د لاسلیک شوې تفاهم نامې له مخې به دغه مسلخ د هډې فارم آمریت اړوند په دویم بلاک کې، پر ۱۸مې نمرې غیر کرنیزې لوړې ځمکې، د ۲۸ جریبه پراخې ساحې په درلودلو سره جوړ شي. مسوولین وایي، دا مسلخ به د عصري تخنیکونو او نړۍوالو معیارونو پر بنسټ جوړېږي او د هېواد د اړتیاوو د پوره کولو وړتیا به ولري.
د معلوماتو له مخې، په یاد مسلخ کې به روغ څاروي د مسلکي ډاکترانو تر مستقیم نظارت لاندې ذبحه کېږي او هېوادوالو ته به د شرعي اصولو، بشپړ نظم، روغتیايي معیارونو او عصري میتودونو په بشپړ رعایت سره خدمات وړاندې کېږي.
مسوولینو زیاته کړه، د دغه مسلخ په جوړېدو سره به د غوښو کیفیت ښه شي، عامه روغتیا به پیاوړې شي او د کرنیز سکتور ترڅنګ به د ملي اقتصاد د ودې لپاره هم مهم او اغېزناک ګام واخیستل شي.
د یادونې وړ ده، چې د هوکړې د لاسلیک پر مهال د ننګرهار وادي کرنیز شرکت د مالي او اداري چارو رییس محمد اجان راشد، د سوداګرۍ او بازار موندنې رییس مولوي نعمتالله سالک، د کرنیزو او تخنیکي چارو رییس انجنیر حکمتالله معروف، د ځمکو د قراردادونو مدیر ذاکرالله شیرزاد او یو شمېر نور مسوولین هم حاضر وو.
