د نورستان د کرنې، اوبولګولو او مالدارۍ نوی رییس معرفي شو
۱۳ سلواغه ۱۴۰۴ه.ش
۱۴ شَعبان المُعَظّم ۱۴۴۷ه.ق
د نورستان د کرنې، اوبو لګولو او مالدارۍ ریاست نوی رییس، مولوي محمد ولي محسن د نورستان د مرستیال والي مولوي فیصل مختار له لوري د یاد ریاست کارکوونکو ته ور وپېژندل شو.
د پېژندنې په غونډه کې د نورستان د کرنې ریاست آمرینو او کارکوونکو ګډون کړی و. مرستیال والي د بدلون او تبدیلي اصل ته په اشارې سره، د پخواني رییس د خدمتونو ستاینه وکړه او د کرنې، اوبو لګولو او مالدارۍ په برخه کې د پروګرامونو پر پراختیا ټینګار وکړ. نوموړي د ولایتي ادارې له لوري د بشپړې همکارۍ ډاډ هم ورکړ او د نورستان د قدرتي سرچینو، ځنګلونو، څړځایونو او اوبو د ساتنې پر ارزښت یې خبرې وکړې.
ورپسې، د نورستان ولایت د کرنې نوی ټاکل شوی رییس مولوي محمد ولي محسن د سپارل شوې دندې په ترسره کولو کې د نه ستړې کېدونکو هڅو ژمنه وکړه او ویې ویل، چې د نورستان د قدرتي سرچینو، ځنګلونو او څړځایونو د ساتنې او اغېزمنې استفادې لپاره به منظم پلانونه عملي کوي.
