د کرنې وزارت د پلان او برنامو د همغږۍ لوی رییس د لغمان د کرنې له رییس سره ناسته وکړه
۸ سلواغه ۱۴۰۴ه.ش
۹ شَعبان المُعَظّم ۱۴۴۷ه.ق
د کرنې، اوبولګولو او مالدارۍ وزارت له لوري یو لوړپوړی پلاوی، چې مشري یې د پلان او برنامو د همغږۍ لوی رییس مولوي عبدالغفور کوله، لغمان ولایت ته د سفر په ترڅ کې د لغمان دکرنې رییس او کارکوونکو سره وکتل.
په یاد پلاوي کې د نظارت او ارزونې رییس امانالله شاهي، د پلان ریاست مشاور حسن خان عزیزي، د نظارت او ارزونې ریاست کارکوونکي لعل محمد سیدي او انجنیر امیراحمد انصاري شامل وو.
یاد پلاوي د لغمان د کرنې، اوبولګولو او مالدارۍ رییس مولوي عبدالستار محمد په حضور کې د دې ریاست له امرینو او کارکوونکو سره ناسته وکړه.
په دې ناسته کې د پلاوي مشر مولوي عبدالغفور وویل، چې د دوی د سفر موخه په لغمان ولایت کې د کرنې، اوبولګولو او مالدارۍ اړوند د پراختیایي پروژو لکه د چکډېمونو، د زهکشۍ پروژو او نورو کرنیزو فعالیتونو، همداراز د مؤسسو له لوري پلي کېدونکو پروژو څارنه ده، تر څو شته نیمګړتیاوې اصلاح او پروژې د وزارت د لارښوونو سره سم په ښه کیفیت او بشپړ شفافیت سره پلي شي. نوموړي زیاته کړه، چې د دې ترڅنګ د سیمې ستونزې او غوښتنې له نږدې اورېدل او د حل لپاره یې لازم اقدامات هم د دې سفر له موخو څخه دي.
ورپسې د لغمان د کرنې، اوبولګولو او مالدارۍ رییس مولوي عبدالستار محمد د یاد پلاوي هرکلی وکړ، د هغوی له هڅو یې مننه وکړه او د پروژو څارنه یې د کارونو د کیفیت او کمیت د ښه والي لپاره مهمه وبلله. نوموړي اړوندو کارکوونکو ته لارښوونه وکړه، چې له پلاوي سره بشپړه همکاري وکړي.
همداراز، د لغمان د کرنې ریاست امرینو او مدیرانو د پلي شوو پروژو په اړه معلومات وړاندې کړل او خپلې ستونزې او غوښتنې یې له یاد پلاوي سره شریکې کړې.
