د کندهار ژړۍ کې دوه زره بېرته راستنو شويو کډوالو ته ځمکې ووېشل شوې
۱ سلواغه ۱۴۰۴ه.ش
۲ شَعبان المُعَظّم ۱۴۴۷ه.ق
د عالیقدر امیرالمؤمنین حفظهالله تعالی د لارښوونې پر بنسټ، هېواد ته د بېرته راستنو شويو کډوالو لپاره د کندهار د کور او ښار جوړونې ریاست او د دې ولایت د کرنې، اوبو لګولو او مالدارۍ ریاست په ګډه همکاري، د کندهار ژړۍ ولسوالی په نوي ښارګوټي کې پر دوه زره بېوزله او مستحقو کډوالو کورنیو د استوګنې په موخه ځمکې ووېشل شوې.
د کندهار ولایت د کور او ښار جوړونې رییس مولوي عبدالمتین سعید وایي، چې د ټاکل شوي کمېسیون د مسؤلینو او کډوالو په حضور کې یادو کورنیو ته د پچې اچونې (قرعهکشی) له لارې، په بشپړه عادلانه او شفافه پروسه کې ځمکې وېشل شوي دي. د نوموړي په وینا، دا مهال د اسنادو د سپارلو لړۍ په چټکۍ سره روانه ده.
مولوي سعید زیاتوي، چې د ښارګوټي د بشپړېدو سره سم به یادو کډوالو کورنیو ته د څښاک اوبو برمې، د اوبو ذخیري، جوماتونه او لوی جامع جوماتونه، تعلیمي مرکزونه، سوداګریز ځایونه، کوچني پلورنځي، روغتیایي خدمتونه، د ښاروالۍ چوپړتیاوې، د لوبو میدانونه، پارکونه او نورې ټولې اړینې او بنسټیزې اسانتیاوې په تدریجي ډول برابرې شي.
په ورته مهال، له پاکستان څخه تازه راستانه شوي کډوال د اسلامي امارت دغه اقدام څخه خوښي څرګندوي او د مسؤلینو څخه مننه وکړه، چې د استوګنې لپاره یې ورته ځمکې وېشلې دي.
د یادونې وړ ده، چې د ا.ا.ا چارواکي د تازه راستنو شویو کډوالو سره دوامداره همکارۍ کوي او هڅه کوي چې بېوزلو او اړمنو کډوالو ته د استوګنې مناسب ځایونه برابر کړي، چې د همدې هڅو په لړ کې دا مهال په ټاکل شویو دوو ښارګوټو کې د ۳۲۰۰ کډوالو لپاره د ځمکو نمرې په نښه شوي دي او ددې ترڅنګ د هېواد په کچه د کرنې وزارت له خوا راستنوشویو کډوالو سره د نغدې او خوراکي مرستو وېش لړۍ هم روانه ده.
