لغمان کې په بڼونو د لایم سلفر د استعمال کمپاین پیل شو؛ بڼونه د آفتونو پر وړاندې وقایه کېږي
۲۹ مرغومې ۱۴۰۴ه.ش
۲۹ رَجَب المُرَجَّب ۱۴۴۷ه.ق
د لغمان د کرنې، اوبولګولو او مالدارۍ ریاست د پراختیایي بودیجې له لارې، د بوټو ساتنې لوی مدیریت د خپل عملیاتي پلان له مخې د لایم سلفر د استعمال کمپاین د مرکز مهترلام څخه رسماً پیل کړ. د یاد کمپاین موخه د بڼونو د ناروغیو او آفتونو د خپرېدو کچه راټیټول او بڼوالو ته عملي او نظري روزنه ورکول دي.
یاد کمپاین د لغمان د کرنې رییس مولوي عبدالستار محمد په لارښوونه، د بوټو ساتنې لوی مدیریت د مسلکي کارکوونکو او د بوټو ساتنې عمومي مدیر محبالله زاهدي له لوري پیل شو.
دغه پروګرام به ۱۰ ورځې دوام وکړي او د مرکز مهترلام په بڼونو کې به عملي شي، چې په ترڅ کې به یې شاوخوا ۲۰ زره مېوهدارې ونې د ناروغیو او آفتونو پر وړاندې وقایه شي.
د یادونې وړ ده، چې دغه وقایوي کمپاین هر کال د کرنې، اوبولګولو او مالدارۍ وزارت په لارښوونه د دې لپاره ترسره کېږي، تر څو د هغو آفتونو او ناروغیو مخه ونیول شي، چې د بڼونو د حاصلاتو د کمېدو لامل ګرځي. همدارنګه، بڼوالو ته د نباتي ناروغیو او آفتونو د مخنیوي لارې چارې په عملي او نظري ډول ورښودل کېږي.
د لغمان د کرنې رییس مولوي عبدالستار محمد وویل: «د دغو پروګرامونو په تطبیق سره نه یوازې ناروغۍ او آفتونه تر کنټرول لاندې راځي، بلکې بڼوال به د پخوا په پرتله لوړ او باکیفیته حاصل هم ترلاسه کړي.»
د یادونې وړ ده، چې تر دې وړاندې هم د ناروغیو او آفتونو د مخنیوي په موخه د ژمني تیلو او یوریا د سپرې وقایوي پروګرامونه تطبیق شوي وو.
