خوست کې د کرنیزو پروژو د پلي کېدو لپاره سروې او څارنه؛ د کورنیو باغچو، سرو املوکو بڼونو او سبو تخمونو وېش ته چمتووالی
۲۹ مرغومې ۱۴۰۴ه.ش
۲۹ رَجَب المُرَجَّب ۱۴۴۷ه.ق
د خوست ولایت د کرنې، اوبو لګولو او مالدارۍ ریاست اړوند د تڼیو ولسوالی د کرنیزو چارو عمومي مدیریت تر نظارت لاندې او د «اوآرډي» مؤسسې په همکارۍ، د دورملکه په ساحه کې د ۲۰ کورنیو لپاره د کورنیو باغچو د جوړولو په موخه ابتدایي سروې ترسره شوه. د یادې سروې موخه د پروژې د عملي کېدو لپاره د اړینو معلوماتو راټولول او د تطبیق لپاره د زمینې برابرول دي، څو دغه کورنۍ وکولای شي له یادو باغچو څخه د خپل عاید د زیاتوالي او د خوړو د خوندیتوب په برخه کې ګټه واخلي.
همدارنګه، د ویرو « ډبلیواياېآراو» مؤسسې په همکارۍ د ګربز صحرا او شاوخوا بېلابېلو کلیو کې د سرو املوکو د بڼونو لپاره د ټاکل شوې ځمکې څخه نظارت ترسره شو. د دې نظارت موخه د ځمکو د مناسبت ارزونه او د پروژې د تطبیق لپاره د تخنیکي شرایطو تثبیت و، څو پروژه په معیاري ډول پلې او دوامدارې پایلې ولري.
په همدې لړ کې، د ترنچونو د کیندنې او د چارو د ښه همغږۍ په موخه، د لیژې، درهګي، اطمان او نریزې له قومي مشرانو سره ګډه غونډه ترسره شوه. په دې غونډه کې د پروژې د تطبیق اړوند مهم ټکي، د خلکو همکاري او د چارو د پرمخ وړلو لارې چارې تر بحث لاندې ونیول شوې او د دواړو لورو ترمنځ پر ګډې همکارۍ ټینګار وشو.
یادې کړنې د کرنیزو پروژو د اغېزمن تطبیق او د بزګرانو د عاید لوړولو په موخه ترسره شوې او د اړوندو ادارو او همکارو مؤسسو ترمنځ د همغږۍ ښه بېلګه بلل کېږي.
له بلې خوا، د خوست ولایت د کرنې، اوبو لګولو او مالدارۍ ریاست تر چتر لاندې، د ځاځي میدان ولسوالی د کرنې او مالدارۍ خدمتونو لوی مدیریت د مستقیم نظارت او د «اوآرډي همکارې مؤسسې په همکارۍ، د ځاځي میدان ولسوالی په بېلابېلو کلیو کې د ۱۰۰مستحقو بزګرانو لپاره د شپږو قلمه سبو تخمونو او کیمیاوي سرو د وېش په موخه سروې ترسره کړه.
یاده سروې د دې لپاره ترسره شوه، تر څو مستحق بزګران په دقیق ډول تثبیت شي او د سبزیجاتو د کرنې د ودې، د کورني عاید د زیاتوالي او د بزګرانو د معیشتي وضعیت د ښه والي زمینه برابره شي.
د یادونې وړ ده، چې د سروې له بشپړېدو وروسته به په نږدې راتلونکي کې یادو تثبیت شويو بزګرانو ته د سبو تخمونه او کیمیاوي سرې په منظم او شفاف ډول ووېشل شي، څو کرنیز تولیدات زیات او د سیمې د خلکو اقتصادي وضعیت لا ښه شي.
