پکتیا: پر سلګونو مالدارانو د څارویو خوراکې توکي ووېشل شول

۲۱مرغومې ۱۴۰۴ه‍.ش
۲۱ رَجَب المُرَجَّب ۱۴۴۷ه‍.ق
د پکتیا ولایت د کرنې، اوبولګولو او مالدارۍ ریاست له لوري، د ملګرو ملتونو د خوړو او کرنې ادارې «اف.اې.او»  په مالي ملاتړ او د افغان ځوانانو خدماتي موسسې په همکارۍ، د دغه ولایت په مرکز ګردېز ښار کې پر ۹۰۰ تنو اړمنو مالدارانو د څارویو خوراکه ووېشل شول.
د یادې مرستندویه پروسې د وېش په مراسمو کې د پکتیا د کرنې، اوبولګولو او مالدارۍ رییس مولوي سیدامین هاشمي، د مالدارۍ آمر قاري نورالله دروېش، د ریاست اړوندو کارکوونکو، د افغان ځوانانو خدماتي موسسې مسؤلینو، مالدارانو او قومي مشرانو ګډون کړی و.
په دې مراسمو کې مولوي سیدامین هاشمي مالدارانو ته د ښه راغلاست ترڅنګ د افغان ځوانانو خدماتي موسسې څخه مننه وکړه او ویې ویل، چې دا مرستې د مرکز ګردېز په کچه پر ۹۰۰ مالدارانو ووېشل شوې، چې د یاد پروګرام له مخې به هر مالدار ته ۲۰۰ کیلو ګرامه حیواني خوراکه په وړیا ډول ورکړل شي.
نوموړي زیاته کړه، چې د دې پروګرام موخه د اړمنو مالدارانو ملاتړ او پر خپلو پښو درول دي، ترڅو د هغوی اقتصادي وضعیت ښه شي او د مالدارۍ سکتور لا پیاوړی شي.
ورپسې د افغان ځوانانو خدماتي موسسې مسؤل ضیاالرحمن هلال وویل، چې د دې مرستندویه پروګرام موخه د اړمنو مالدارانو ملاتړ او د هغوی د مالدارۍ دوام تضمینول دي. نوموړي زیاته کړه، چې افغان ځوانانو خدماتي موسسه به د همکارو ادارو سره په ګډه هڅه وکړي، څو په راتلونکي کې هم ورته اغېزمنې مرستې د مالدارانو لپاره برابرې کړي.