د خوست تڼیو ولسوالی کې د چهارمغزو نیالګیو د کېنولو پروژې چارې پیل شوې
۲۱مرغومې ۱۴۰۴ه.ش
۲۱ رَجَب المُرَجَّب ۱۴۴۷ه.ق
د خوست ولایت د کرنې، اوبو لګولو او مالدارۍ ریاست له لوري، د کرنې، اوبو لګولو او مالدارۍ وزارت د پراختیایي بودیجې په تمویل، د خوست ولایت په تڼیو ولسوالی کې د ۱۰ زره اصله چهارمغزو نیالګیو د کېنولو پروژې د تطبیق چارې پیل شوې.
د یادې پروژې د عملي کېدو په موخه، د ولایتي او ولسوالی د ګډ پلاوی په حضور کې د تڼیو ولسوالی اړوند د چري پخښۍ ټولنې ته ۵۶۰۰ اصله چهارمغزو نیالګي په رسمي ډول وسپارل شول. همدارنګه، پاتې ۴۴۰۰ اصله چهارمغزو نیالګي به په نږدې راتلونکو ورځو کې ټاکل شوې سیمې ته انتقال او یادې ټولنې ته وسپارل شي، څو د پروژې ټولې چارې د پلان سره سم بشپړې شي.
د یادونې وړ ده، چې د دې پروژې د بشپړ تطبیق په پایله کې به د تڼیو ولسوالی په اړونده سیمه کې د ۲۵ هکټاره په مساحت د چهارمغزو مصنوعي ځنګل رامنځته شي. دغه ځنګل به د سیمې د سرسبزۍ ترڅنګ د چاپېریال ساتنې، د خاورې د تخریب مخنیوي او د ځایي خلکو د اقتصادي پیاوړتیا په برخه کې مهم او دوامدار رول ولوبوي.
