د میدان وردګو سیداباد ولسوالی کې پر ۲۵ مستحقو کورنیو د مالدارۍ مرستې ووېشل شوې
د میدان وردګو ولایت د سیداباد ولسوالی اړوند د شیخ‌اباد او تنګي په حوزو کې، د «ان.سي.اې» مؤسسې تر چتر لاندې او د کرنې، اوبو لګولو او مالدارۍ ریاست په پوره همکارۍ، ۲۵ مستحقو کورنیو ته د معیشت پیاوړتیا او د سیمې د محلي اقتصاد ودې په موخه د مالدارۍ مرستې ووېشل شوې.
په یاد پروګرام کې هرې مستحقې کورنۍ ته یوه د شېدو غوا او د څارويو د ساتنې او تغذیې په موخه ۲۵ کیلوګرامه د غواګانو خوراکي مواد ورکړل شول. د وېش د لړۍ له مخې، د شیخ‌اباد په حوزه کې ۱۳ دانې د شېدو غواګانې او اړوند خوراکي مواد، او د تنګي په حوزه کې ۱۲ دانې د شېدو غواګانې او ۲۵ کیلوګرامه د تغذیې ملاتړ مواد مستحقو کورنیو ته ووېشل شول.
د دغو مرستو د وېش بهیر د «ان.سي.اې» مؤسسې د استازو او د میدان وردګو ولایت د کرنې، اوبو لګولو او مالدارۍ ریاست د مسؤلو کارکوونکو په حضور کې، په شفاف او منظم ډول ترسره شو.
