د هلمند مرکز لښکرګاه کې یوشمېر بڼوال وروزل شول
۴ مرغومې ۱۴۰۴هـ.ش
۴ رَجَب المُرَجَّب ۱۴۴۷هـ.ق
د هلمند د کرنې، اوبولګولو او مالدارۍ ریاست د کرنیزو چارو آمریت اړوند د بوټو ساتنې او قرنطین مدیریت مسلکي کارکوونکو د یوریا سپرې پروګرام د دوام په لړ کې د مرکز لښکرګاه د کاریز سیمې یو شمېر بڼوالو ته عملي او نظري روزنه ورکړه.
یاده روزنه کې بڼوالو ته د بڼونو د سمې روزنې، اصولي اوبولګولو، د حیواني او کیمیاوي سرو د مناسب استعمال، او د یوریا سپرې محلول د جوړولو او پاشلو طریقې په تفصیل تشریح او په عملي ډول ور زده کړل شوې.
ددې پروګرام په ترڅ کې بڼوالو ته وویل شول، چې د یوریا سپرې محلول د افاتو او ناروغیو د مخنیوي او له منځه وړلو ترڅنګ وقایوي درملنه هم ده، چې د هغې په تطبیق سره به د نمو په فصل کې د حاصلاتو اندازه او کیفیت زیات شي.
یاده روزنه د بڼوالۍ د ښه والي او د بزګرانو د اقتصادي پیاوړتیا په موخه ترسره شوه.
