پکتیکا کې د «پریفال» پروژې تطبیق؛ د زیانمنو ټولنو د معیشت ښهوالی او د خطرونو پر وړاندې د ظرفیت پیاوړتیا
۳ مرغومې ۱۴۰۴ه.ش
۳ رَجَب المُرَجَّب ۱۴۴۷ه.ق
د اړیکو دفتر «ټي.ال.او» له لوري د «پریفال» پروژه، چې موخه یې د زیانمنو ټولنو د معیشت ښهوالی او د خطرونو پر وړاندې د خلکو د ظرفیت پیاوړتیا ده، د پکتیکا ولایت د کرنې، اوبو لګولو او مالدارۍ ریاست تر چتر لاندې په مرکز ښرنه او یوشمېر ولسوالیو کې په پوره همغږۍ سره پلي کېږي.
یاده پروژه د پکتیکا ولایت د کرنې ریاست په رهبرۍ او همغږۍ، د مرکز ښرنه، یوسفخېل، خیرکوټ او اورګون ولسوالیو کې روانه ده، چې موخه یې د قدرتي سرچینو دوامداره مدیریت، د خطرونو کمول او د خلکو د اقتصادي وضعیت ښهوالی دی.
د پروژې د تطبیق په لړ کې د سروې له لارې ۱۵ واټرشیډونه انتخاب شوي، چې د هر واټرشیډ لپاره د اوبو مدیریت کمیټه «ډبلیو.ام.سي» او د خطرونو د کمولو کمیټه جوړه شوې ده. همدارنګه د C-HVCA مېتود له لارې د خطرونو تحلیلي نقشې د یادو کمیټو په همکارۍ چمتو شوې دي.
په دې پروژه کې اړوند کارکوونکو ته مسلکي روزنې ورکړل شوې او کاري وسایل هم وېشل شوي دي. د اوبولګولو اړوند، سولري سیستمونه، چوکاتونه، سمرسیبل پمپونه، انورټرونه، د شبکې پایپونه، د اوبو د ذخیرې ټانکونه او نللیکې نصب شوې دي.
د معلوماتو له مخې، په هر واټرشیډ کې ۶۰۰۰ ترینچونه او په ټولیز ډول ۹۰ زره ترینچونه کیندل شوي دي. د پروژې له لارې شاوخوا ۳۶۰۰ کسانو ته د کار زمینه برابره شوې، چې د ربیعالاول او ربیعالثاني میاشتو په ترڅ کې ټولې ۵۴ زره کاري ورځې رامنځته شوې دي. همدارنګه په منځنۍ کچه په هره سیمه کې ۴۹ متر مکعب کاري فعالیت ترسره شوی دی.
د پکتیکا د کرنې ریاست یاده پروژه د ولایت د خلکو لپاره ارزښتناکه بللې او ټینګار یې کړی، چې د ورته پروژو تطبیق د قدرتي سرچینو ساتنې، د خطرونو کمولو او د کروندګرو د معیشت د پیاوړتیا لپاره مهم رول لري.
