د کندهار نېش ولسوالی کې پر ۲۵۰ بزګرانو عضوي سره ووېشل شوه

۳۰ لیندۍ ۱۴۰۴ هـ.ش
۳۰ جُمَادَى الثاني ۱۴۴۷ هـ.ق
د کندهار د کرنې، اوبو لګولو او مالدارۍ ریاست په هڅو، د ملګرو ملتونو د پراختیايي پروګرام (یو.این.ډي.پي) په مالي ملاتړ او د نېش ولسوالی د کرنې او مالدارۍ مسؤلینو تر څارنې لاندې، د یادې ولسوالی ۲۵۰ بزګرانو ته عضوي سره یا کمپوسټ ووېشل شوه.
د کندهار دکرنې ریاست چارواکي وایي، د مرستې له وېش وړاندې اړمنو بزګرانو ته د عضوي سرې د سم استعمال، اندازې او کارونې په اړه عملي او نظري ښوونیز پروګرام ترسره شو، ترڅو بزګران وکولای شي دا سره په اغېزمن او معیاري ډول وکاروي. چې وروسته هر بزګر ته ۵۰ کیلو ګرامه عضوي سره یا کمپوسټ ووېشل شوه.
د دې مرستې موخه د کیمیاوي سرو پر ځای د عضوي سرو دودول، د بزګرانو ترمنځ د کمپوسټ استعمال ته وده ورکول، د حاصلاتو زیاتوالی، د اقلیمي بدلونونو د منفي اغېزو کمول، د خاورې اصلاح او حاصلخېزي، په خاوره کې د رطوبت ساتنه، د لوړ کیفیت لرونکو محصولاتو ترلاسه کول او د عضوي کرنې پراختیا ده.
د یادونې وړ ده، چې د کندهار د کرنې ریاست په دې وروستیو کې د کرنې سکتور د ودې او پراختیا لپاره خپلې هڅې لا چټکې کړې دي، چې په همدې لړ کې یې د (یو.این.ډي.پي) په مالي ملاتړ په روان کې د کندهار ښار او دوو ولسوالیو کې ۱۰۰ شنې خونې جوړې کړې او بزګرانو ته یې سپارلې دي.