د خوست موسیخیلو ولسوالی کې پر مستحقو کورنیو د ۶۰۰ اوښمارغو وېش لړۍ ترسره شوه
۲۹ لیندۍ ۱۴۰۴ هـ.ش
۲۹ جُمَادَى الثاني ۱۴۴۷ هـ.ق
د خوست ولایت د کرنې، اوبو لګولو او مالدارۍ ریاست تر څارنې لاندې او د افغان پرمختیایي مؤسسې په همکارۍ، په موسیخیلو ولسوالۍ کې د مالدارۍ د پیاوړتیا او د کورنیو د عوایدو لوړولو په موخه پر مستحقو کورنیو د اوښمارغو د وېش پروسه عملي شوه.
یاده پروسه د موسیخیلو ولسوالۍ د کرنیزو چارو عمومي مدیریت تر څارنې لاندې، د حیواني روغتیا او مالدارۍ آمریت د ډاکټر محمد ایوب خاورین په حضور کې، د افغان پرمختیایي مؤسسې په همکارۍ د یادې ولسوالۍ د شپږو کلیو (بچیکوټ، هواسکهول، شیرخۍ، بابتي، منيخېل او میوهکهول) په کچه ترسره شوه.
په دې لړۍ کې ټولټال ۶۰۰ اوښمارغه د ۴۰ مستحقو کورنیو ترمنځ ووېشل شول، چې هرې کورنۍ ته ۱۳ ښځینه او ۲ نارینه اوښمارغه وسپارل شول.
همدارنګه، وېشل شوي اوښمارغه د درې ورځو لپاره د قرنطین تر څارنې لاندې ونیول شول او مستحقو کورنیو ته د اوښمارغو د سمې ساتنې، مناسب خوراک، پاکو اوبو، دانې او حفظالصحې په برخه کې لازمې او عملي سپارښتنې وشوې، تر څو د ناروغیو مخنیوی وشي او د تولید کچه لوړه شي.
د خوست ولایت د کرنې، اوبو لګولو او مالدارۍ ریاست رهبري ټینګار کوي، چې د مالدارانو د ملاتړ، د هغوی د عوایدو لوړولو او د اقتصادي پیاوړتیا په موخه به خپلې همکارۍ او خدمتونه لا پراخ کړي.
