د کونړ کرنې ریاست او اکټیډ موسسې ترمنځ د خوړو خوندیتوب په برخه کې د همغږۍ ناسته ترسره شوه

۲۷ لیندۍ ۱۴۰۴ هـ.ش
۲۷ جُمَادَى الثاني ۱۴۴۷ هـ.ق
د کونړ ولایت د کرنې، اوبو لګولو او مالدارۍ ریاست په مقام کې د یاد ریاست د رییس مولوي محمد سرور صادق په مشرۍ، د اکټیډ  موسسې له پلاوي سره رسمي ناسته وشوه، چې موخه یې د خوړو خوندیتوب، د مرستندویه پروګرامونو د تطبیق او متقابلې همغږۍ پیاوړتیا وه.
یاده ناسته د کونړ ولایت د کرنې، اوبو لګولو او مالدارۍ ریاست په مقام کې د ریاست د رییس مولوي محمد سرور صادق په مشرۍ، د اړوندو تخنیکي آمریتونو له آمرینو سره په ګډه ترسره شوه. په دې ناسته کې د اکټیډ موسسې هغه پلاوي ګډون درلود، چې د کابل له مرکزي دفتر او ختیځ زون څخه کونړ ولایت ته راغلی و.
د ناستې اصلي موخه د خوړو خوندیتوب په برخه کې د مرستندویه پروګرامونو د اغېزمن تطبیق، د معلوماتو د راټولولو، د اړتیاوو د ارزونې او د دواړو لورو ترمنځ د همغږۍ پیاوړتیا وه. په دې لړ کې د کونړ کرنې ریاست رهبري او مسلکي تخنیکي کارکوونکو د ولایت د کرنیزو سکتورونو اوسنی وضعیت، شته ستونزې او لومړنۍ اړتیاوې د اکټیډ موسسې له پلاوي سره شریکې کړې.
همدارنګه، د کرنې، مالدارۍ، ځنګل ساتنې، د اوبو مدیریت او اوبو لګولو په برخو کې موجودې اړتیاوې او لومړیتوبونه تشریح شول او د یادو سکتورونو د پیاوړتیا لپاره سالم، عملي او دوامدار وړاندیزونه وړاندې شول، څو د کرنیزو فعالیتونو اغېزمنتیا زیاته او د بزګرانو د ژوند شرایط ښه شي.
د اکټیډ) موسسې د کابل مرکزي دفتر او ختیځ زون استازو د کونړ کرنې ریاست ته ډاډ ورکړ، چې د شریک شوو اړتیاوو او وړاندیزونو بشپړ جزئیات به له اړوندو ډونرانو او همکارو ادارو سره شریک کړي، ترڅو د اړتیا پر بنسټ مؤثرې او دوامدارې مرستې تنظیم او عملي شي.
د ناستې په پای کې د کونړ ولایت د کرنې، اوبو لګولو او مالدارۍ ریاست رهبري د اکټیډ موسسې د پلاوي له راتګ، همکارۍ او د کرنې او خوړو خوندیتوب په برخه کې د ترسره کېدونکو فعالیتونو څخه مننه وکړه او د دواړو لورو ترمنځ یې د دوامدارو همکاریو پر ارزښت ټینګار وکړ.